Në seancën e sotme të qeverisë pritet të miratohet propozimi për shkarkimin e prokurorit publik të shtetit, Ljupço Kocevski. Siç njoftoi dje kryeministri Hristijan Mickoski, procedura mund të zgjasë disa javë apo muaj, sipas ligjit.
Duke iu përgjigjur pyetjeve të gazetarëve në konferencën e djeshme për media nëse në seancën e sotme të Qeverisë do të shqyrtohet dhe do të pranohet propozimi për shkarkimin e Kocevskit, ai ka sqaruar se Qeveria nuk mund ta shkarkojë atë, por vetëm mund ta inicojë procedurën.
“Ne si Qeveri absolutisht nuk mund ta shkarkojmë atë, por mund ta inicojmë procedurën. Me sa di unë letra duhet t’i dërgohet Këshillit të Prokurorëve Publikë dhe aty duhet të presim mendim brenda 15 ditëve. Kjo procedurë do të marrë kohë, nuk do të përfundojë menjëherë. Kështu është ligji”, tha Mickoski.
Prokurori Publik i Shtetit, siç thuhet nga Ministria e Drejtësisë, ka vepruar në rastet në të cilat, sipas dispozitave ligjore, ka pasur rrethana që kanë ngritur dyshime për paanshmërinë e tij, si dhe ka pasur konflikt interesi, dhe rrethanat për të cilat është dashur t’i dijë dhe nga të cilat është dashur të përjashtohet.
Prokurori republikan Kocevski mohon pretendimin se ka vepruar në mënyrë të kundërligjshme, duke theksuar se ka zbatuar ligjin dhe afatet në të. Ai ka thënë se për propozimin për shkarkimin e tij do të flasë pasi Qeveria ta dorëzojë në Këshillin e Prokurorëve Publikë. Lidhur me kërkesën e kryeministrit Hristijan Mickoski për largim nga detyra, Kocevski tha se do të përgjigjet pasi të shohë arsyet e parapara me Ligjin për Prokurorinë Publike. Nëse vërtetohet se ka vërtet shkelje të rëndë disiplinore, ai tha se do të japë dorëheqjen vetë.
Sot qeveria shqyrton propozimin për shkarkimin e kryeprokurorit Ljupço Kocevski appeared first on Telegrafi.
