Zotëri President, bëni thirrjen. Jepini fund këtij gjenocidi.
Përfytyroni këtë skenë. Një kryeministër izraelit nis sulmet ajrore ndaj një popullsie arabe. Mijëra civilë vriten. Një president amerikan, i habitur dhe i tronditur nga skenat e masakrës në ekranin e tij televiziv, i bën një telefonatë homologut të tij izraelit. Dhe… brenda pak minutash… bombardimi mbaroi.
Tingëllon e çmendur? Apo ndoshta shumë e thjeshtë? Madje, ndoshta edhe naive?
Megjithatë, ishte viti 1982. Ajo që supozohej të ishte një inkursion i kufizuar në Libanin jugor nga ushtria izraelite gjatë verës, nën udhëheqjen e Ariel Sharon, atëherë ministër i mbrojtjes (e mbani mend atë?), u shndërrua në një rrethim prej muajsh të Bejrutit dhe një sulm të gjithanshëm ndaj Organizatës për Çlirimin e Palestinës. Midis qershorit dhe gushtit, izraelitët ndërprenë ushqimin, ujin dhe energjinë për kryeqytetin libanez në një përpjekje brutale për të shkatërruar PLO-në, luftëtarët e së cilës ishin të izoluar brenda një rrjeti tunelesh poshtë Bejrutit. (Ju duket e njohur?)
Më 12 gusht, në atë që më vonë do të quhej “E Enjtja e Zezë”, avionët izraelitë bombarduan Bejrutin për 11 orë rresht, duke vrarë më shumë se 100 njerëz. Po atë ditë, një Ronald Reagan i tmerruar i bëri një telefonatë Menachem Begin, atëherë kryeministër izraelit, për të “shprehur zemërimin e tij” dhe për të dënuar “shkatërrimin dhe gjakderdhjen e panevojshme”.
“Menachem, ky është një holokaust”, i tha Regan Beginit.
Po, një udhëheqës amerikan përdori fjalën H në bisedë me një udhëheqës izraelit. Begin u përgjigj me sarkazëm, duke i thënë presidentit amerikan se “Unë mendoj se e di se çfarë është një holokaust”. Reagan, megjithatë, nuk u tërhoq, duke këmbëngulur në “imperativin” për një armëpushim në Bejrut.
Njëzet minuta. Kjo është e gjithë koha që i desh Beginit të telefononte dhe t’i thoshte presidentit se kishte urdhëruar Sharonin të ndalonte bombardimet. Ajo kishte mbaruar. “Unë nuk e dija se kisha atë lloj fuqie”, i tha një Regan i habitur një ndihmësi, pasi uli telefonin.
Pas 42 vitesh, sulmi izraelit në Gazë ka zgjatur tashmë dy herë më shumë se rrethimi i Bejrutit. Në vitin 1982, Reagan u tha se ishte prekur nga imazhi i një fëmije të vetëm të plagosur libanez. Që nga java e kaluar, më shumë se 12,300 fëmijë palestinezë ishin vrarë në Gazë dhe dhjetëra mijëra të gjymtuar dhe plagosur, në vetëm katër muaj.
Pastaj, ishte lajmi i natës. Tani, ne të gjithë kemi Instagram. “Komuniteti ndërkombëtar vazhdon të dështojë karshi popullit palestinez”, tha avokati irlandez Blinne Ni Ghralaigh në gjykatën ndërkombëtare të drejtësisë në Hagë muajin e kaluar, “pavarësisht nga tmerri i gjenocidit kundër popullit palestinez që transmetohet drejtpërdrejt nga Gaza në vendin tonë. Telefonat celularë, kompjuterët dhe ekranet e televizorit. Gjenocidi i parë në histori ku viktimat e tij po transmetojnë shkatërrimin e tyre në kohë reale me shpresën e dëshpëruar, deri tani të kota, se bota mund të bëjë diçka”.
Harrojeni botën. Joe Biden, si Reagan para tij, mund t’i japë fund masakrës aktuale me një telefonatë të vetme me Benjamin Netanyahu. Ai gjithashtu ka “atë lloj pushteti”.
Mos i besoni askujt që ju thotë të kundërtën. Ata në media që thonë se “Amerika po zbulon kufijtë e ndikimit të saj ndaj Izraelit”. Ata në Kongres që argumentojnë se presidentët amerikanë “nuk kanë aq ndikim mbi Izraelin sa mendonin”. Ata në Shtëpinë e Bardhë që pretendojnë “ata nuk janë në gjendje të ushtrojnë ndikim të rëndësishëm në aleatin më të ngushtë të Amerikës në Lindjen e Mesme për të ndryshuar kursin e saj”.
E gjithë kjo është marrëzi e pakuptimtë. Është, për të cituar kritikun e medias Adam Johnson, një “pafuqi e shtirur” që është mbështetur nga një seri “rrjedhjesh vetëshërbyese” nga Shtëpia e Bardhë.
E vërteta është se komandanti i përgjithshëm i vendit më të pasur në historinë e botës është larg të qenit i pafuqishëm dhe, si çdo kryekomandant para tij, ka mjaft leva.
Është me të vërtetë kaq e thjeshtë.
Pra, zotëri President, nuk ka kuptim të “shfryni” zhgënjimin tuaj privatisht dhe t’u thoni vetëm ndihmësve tuaj se lufta “duhet të ndalet”.
Thuaja këtë Netanyahut. Bëni thirrjen. Jepini fund këtij gjenocidi.
Mehdi Hasan është autor dhe ish-prezantues në MSNBC. Ai është po ashtu kolumnist i The Guardian. Përktheu dhe përshtati Gazeta Online Reporteri.net.
Bideni mund t’i japë fund bombardimeve në Gazë / shkruan Gazeta Online Reporteri.net.
