Kryeministri i Maqedonisë së Veriut, Talat Xhaferi, më 13 dhe 14 shkurt të vitit 2024 (e martë dhe e mërkurë) do të qëndrojë për vizitë pune në Bruksel, e cila do të jetë vizita e parë ndërkombëtare pas marrjes së detyrës.
Në delegacionin e kryesuar nga Kryeministri do të jenë zëvendëskryetari i parë i Qeverisë së Republikës së Maqedonisë së Veriut për Çështje Evropiane, Bojan Mariçiq dhe ministri i Punëve të Jashtme, Bujar Osmani. Në kuadër të vizitës, Xhaferi do të vizitojë selinë e NATO-s dhe Këshillit Evropian, Komisionin Evropian dhe Parlamentin Evropian.
“Në selinë e NATO-s, Kryeministri do të takohet me Zëvendëssekretarin e Përgjithshëm Mirçea Xhoana, më pas do të zhvillojë takime të ndara me liderët e Këshillit Evropian, Charles Michel dhe të Komisionit Evropian, Ursula von der Leyen. Në Parlamentin Evropian, Kryeministri do të realizojë një takim me një grup euro-deputetësh të partive politike pro-evropiane”.
“Në takimin me ZSP të NATO-s në fokus do të jenë temat që kanë të bëjnë me sigurinë dhe stabilitetin rajonal dhe të kontinentit evropian, si dhe kontributin aktiv të Maqedonisë së Veriut në Aleancë”.
“Me liderët evropianë, Kryeministri Xhaferi do të bisedojë për prioritetet e Qeverisë në drejtim të vazhdimit të procesit të integrimit evropian, duke u përqendruar në reformat dhe prioritetet që kanë të bëjnë me Planin e rritjes, përgatitjet për zgjedhjet e ardhshme të dyfishta, si dhe tema nga rajoni dhe konteksti global”, thuhet në njoftimin e Qeverisë për vizitën e parë të Xhaferit në Bruksel.
Xhaferi vizitën e parë zyrtare në Bruksel, do të takohet me Charles Michel dhe Ursula von der Leyen appeared first on Telegrafi.
