“Dimitar Apasiev dha mbështetje publike për Danella Arsovskën për aktivitetet e saj të porositura nga BDI, kundër qytetarëve të Çairit dhe Sarajit. Dimitar Apasiev nuk e fsheh më koalicionin e “Të Majtës”, BDI-së dhe Arsovskës. Nëse qytetarëve të Çairit, Sarajit dhe Shkupit nuk u ishte e qartë arsyeja e kaosit që po shkakton Danella Arsovska, tani gjithçka bëhet e qartë. Kjo është fryt i bashkëpunimit të BDI-së me Të Majtën”, thonë nga koalicioni VLEN.
Nga ky koalicion thonë se po tentohet të fshihen dhe mbrohen ndërtimet pa leje që i ka ndërtuar BDI me partnerët e tyre.
“Qëllimi është të fajësojnë të tjerët, të fajësojnë familje të zakonshme shqiptare që mezi kanë legalizuar ndonjë banesë apo shtëpi prej 50-60 metrash katrorë, për të fshehur depot, pishinat, pallatet dhe objektet tjera të Klanit BDI që sundon në Saraj dhe Shutkë. Është e qartë se Danella Arsovska ka ndonjë përfitim të vogël nga klani i BDI-së, dhe po turpërohen publikisht. Drejtorët e ndërmarrjeve publike në Shkup janë kuadro të Blerim Bexhetit nga njëra anë dhe të Levicës dhe Dimitar Apasievit nga ana tjetër. Ajo që nuk pastrohet, nuk mblidhen mbeturinat, nuk lahen rrugët – dhe kjo pikërisht në lagjet ku banojnë shqiptarët – është rezultat i koalicionit të Blerimit, Apasievit dhe Danellës. Drejtorët e tyre me vetëdije nuk e kryejnë punën. Koalicioni në Qytetin e Shkupit është i dukshëm në çdo seancë të Këshillit të Qytetit. Për raportet e drejtorëve nga BDI gjithmonë voton pozitivisht Levica, dhe për raportet e drejtorëve të Levicës, BDI voton në kthim. Koalicionin e Levicës, BDI-së dhe Danella Arsovskës e ka konfirmuar në një deklaratë edhe ish-nënkryetari i Qytetit të Shkupit, Aleksandar Trajanovski. Shqiptarëve në Shkup, duhet t’u bëhet e qartë se i gjithë ky kaos, papastërti, ndërtime dhe biznese janë për shkak të interesave personale të Klanit të BDI-së dhe Danella Arsovskës. Një bashkëpunim i shkëlqyeshëm për ta dhe në interes të tyre, ndërsa në dëm të shqiptarëve në Shkup”, thonë nga VLEN.
Sipas VLEN-it, në Saraj nuk investohet asgjë.
“Më datë 12.10.2021, Arsovska publikisht premtoi: “Për të gjitha vendbanimet në Saraj do të ketë program të veçantë me prioritet për zgjidhjen e problemeve kyçe të infrastrukturës, ujësjellësit dhe kanalizimit. Do të ndërtohet më në fund edhe rrethrrotullimi në hyrje të Sarajit. Do të lidhet Kanioni Matka me autostradën dhe rrethrrotullimin.” I gjithë mandati i kaloi dhe nuk është bërë asgjë. Në Çair është edhe më keq. As bulevarde, as parqe. Edhe pse u premtuan. Ajo që nuk u premtua, por u realizua, janë pozitat drejtuese për kuadrot e Blerimit dhe Apasievit. Qytetarët e Shkupit, të Sarajit dhe të Çairit nuk duhet të jenë peng i interesave të biznesit të Klanit të BDI-së dhe Danella Arsovskës. I bëjmë thirrje kryetares së Qytetit të Shkupit që të dërgojë ndërmarrjet publike të kryejnë punën e tyre. Shkupi, Saraji dhe Çairi po mbyten në mbeturina dhe papastërti. Do të ketë përgjegjësi. Qytetarët nuk janë të verbër. Mjaft i keni nënçmuar. Ju përplaseni në gjoks për patriotizëm, ndërkohë punoni me Apasievin. Mjaft ishte me BDI-në. Mjaft ishte me një sistem të kalbur në dëm të shqiptarëve. VLEN, në ditët në vijim, do ta informojë publikun me detaje për të gjitha objektet pa leje të Klanit të BDI-së që sundon në Saraj dhe Shutkë. VLEN do t’i informojë edhe institucionet – MPB, Antikorrupsionin dhe Prokurorinë. Publiku do ta shohë imazhin e Danellës dhe interesin e vogël të Dimitar Apasievit, por gjithashtu do ta shohë edhe të gjithë perandorinë kriminale përreth Klanit të BDI-së që sundon në Saraj dhe Shutkë”, thuhet në reagimin e VLEN-it.
VLEN: Apasiev mbështet publikisht aktivitetet e Arsovskës të porositura nga BDI appeared first on Telegrafi.