Justin Timberlake ka zbuluar se është diagnostikuar me një sëmundje serioze, të cilën e mori vesh gjatë turit të tij botëror “Forget Tomorrow”. Këngëtari 44-vjeçar tha se kjo sëmundje e quajtur Lyme (infeksion bakterial), i dha shpjegim lodhjes ekstreme dhe dhimbjeve të forta nervore që ndjente gjatë performancave në skenë.
Në një postim emocional në Instagram pas përfundimit të turit në Turqi, Timberlake shkroi: “Siç e dini, jam një person shumë privat. Por teksa reflektoj mbi këtë tur të gjatë dhe të vështirë, dua të ndaj me ju çfarë kam kaluar në prapaskenë.”
Ai tregoi se ishte përballur me një sërë problemesh shëndetësore që e detyruan ta konsideronte ndërprerjen e turit, por vendosi të vazhdonte, duke u mbështetur tek dashuria për skenën dhe muzika.
“Gëzimi që më jep performanca e mbizotëroi dhimbjen,” tha ai.
Pavarësisht se mjekët ia kishin sugjeruar ndërprerjen, Timberlake vazhdoi turneun e nisur në prill 2024, duke e përfunduar më 30 korrik në Turqi. “Jo vetëm që i provova vetes forcën mendore, por krijova kujtime të paharrueshme me ju,” tha ai.
Ai u ndal edhe te kritikat e fundit që kishte marrë në rrjete sociale për performanca “të vakëta”. “Po përpiqem të jem më transparent për betejat e mia, që të mos keqinterpretohen,” shkroi Timberlake.
Këngëtari është përballur më herët edhe me sfida të tjera. Në shtator 2024, ai u deklarua fajtor për drejtim automjeti në gjendje të dehur, ndërsa është vënë në qendër të kritikave pas publikimit të detajeve nga marrëdhënia e tij me Britney Spears.
Justin Timberlake, ish-anëtari i grupit NSYNC, është një ndër artistët më të suksesshëm në histori me 10 çmime Grammy në karrierën e tij solo. Ai është i martuar me aktoren Jessica Biel.
Sëmundja që e fshehu gjatë gjithë turit, Justin Timberlake trondit rrjetin / shkruan Gazeta Online Reporteri.net.
