Në kuadër të samitit qeveritar hungarezo-maqedonas, i cili po mbahet në Budapest, ministri i Vetëqeverisjes Lokale, Zllatko Perinski, realizoi takim dypalësh me Tibor Navraçiq, ministrin për Administratë Publike dhe Zhvillim Rajonal të Hungarisë.
Gjatë takimit, të dy ministrat diskutuan për zhvillimin rajonal, qëndrueshmërinë e sistemeve të qeverisjes lokale, decentralizimin dhe organizimin territorial të të dyja vendeve, si dhe ndanë dhe shkëmbyen përvoja dhe praktika me interes për përmirësimin e mënyrave të funksionimit të vetëqeverisjes lokale në të dyja vendet.
U shkëmbyen gjithashtu përvoja për mënyrën dhe organizimin e ministrisë hungareze në pjesën e mekanizmave që përdor për zhvillimin rajonal, digjitalizimin e shërbimeve lokale dhe forcimin e kapaciteteve komunale.
“Bashkëpunimi dhe mbështetja e deritanishme nga miqtë tanë hungarezë është jashtëzakonisht e rëndësishme për vendin tonë. Hungaria është një mik dhe partner afatgjatë në reformat tona dhe me kënaqësi ndajmë praktikat e saj të suksesshme në fusha që janë me rëndësi të madhe për vetëqeverisjen tonë lokale dhe zhvillimin rajonal. Ky takim është një tjetër dëshmi e mbështetjes së fortë dhe të vazhdueshme që marrim nga Hungaria, ndërsa njëkohësisht hap mundësi të reja për thellimin e bashkëpunimit mes vendeve tona”, deklaroi ministri Perinski pas takimit, ku u diskutua edhe për mundësinë e forcimit të bashkëpunimit në fushën e rrjetëzimit të komuniteteve tona lokale brenda programeve të BE-së, gjë që do të kontribuonte në nxitjen e inovacioneve dhe praktikave më të mira në nivel lokal.
“Përvojat e ndara janë veçanërisht të rëndësishme për përmirësimin e kapaciteteve të administratës lokale dhe zhvillimin rajonal në vendin tonë, ndërsa intensifikimi i bashkëpunimit është një hap i rëndësishëm në forcimin e partneritetit tonë me Hungarinë, si dhe në realizimin e ambicieve evropiane të vendit”, shtoi Perinski, i cili gjatë takimit informoi ministrin Navraçiq për progresin e deritanishëm të projektit për mbështetje financiare të projekteve infrastrukturore – një nga masat më të rëndësishme të qeverisë sonë për avancimin e zhvillimit komunal, që po realizohet me fondet e siguruara nga kredia hungareze.
Perinski në Budapest: Partneriteti me Hungarinë do të kontribuojë në avancimin e zhvillimit komunal appeared first on Telegrafi.
