Pasi disa nga portalet e lajmeve në vend kanë publikuar mëngjesin e sotëm se me vendim të qeverisë janë tërhequr disa ambasadorë të emëruar nga presidenti i mëparshëm i vendit, Stevo Pendarovski, nga Ministria e Punëve të Jashtme dhe Tregtisë së Jashtme njoftojnë se bëhet fjalë për pretendime të pasakta, të cilat, siç shtojnë, nuk përkojnë fare me gjendjen aktuale.
Lidhur me procedurën për tërheqjen e një numri të caktuar të ambasadorëve, Ministria informon se janë në komunikim të rregullt dhe të vazhdueshëm me kabinetin e Presidentes së vendit, Gordana Siljanovska-Davkova.
Siç njoftojnë dhe sqarojnë ata, deri më tani, përmes sistemit zyrtar të komunikimit të brendshëm, nëntë ambasadorë janë njoftuar për përfundimin e mandatit të tyre dhe se në periudhën në vijim presidenti i vendit pritet të nënshkruajë dekretet për tërheqjen e tyre.
Nga Ministria theksojnë gjithashtu se i gjithë koordinimi dhe komunikimi institucional, përfshirë atë me përfaqësitë diplomatike dhe konsullore, bëhet përmes një sistemi të brendshëm të mbrojtur dhe jo përmes emailit.
Gjithashtu, ata theksojnë se kohët e fundit në rrjetet sociale dhe në disa media janë shfaqur shpesh herë foto të fabrikuara dhe të pasakta të komunikimit të pretenduar me email mes punonjësve të Ministrisë.
“Për zbardhjen dhe përpunimin e duhur të këtyre dukurive, Ministria e Punëve të Jashtme dhe Tregtisë së Jashtme tashmë ka paraqitur një raport dhe ka kërkuar ndërhyrje nga Sektori i Krimit Kibernetik të MPB-së”, thuhet në njoftim./Telegrafi/
MPJ-Maqedoni për ambasadorët e tërhequr: Akuza të pasakta që nuk korrespondojnë me situatën aktuale appeared first on Telegrafi.
