Kryeministri i Maqedonisë së Veriut, Hristijan Mickoski sot tha se me formimin e Këshillit për Inovacione, Zhvillim Shkencoro-Teknologjik dhe Sipërmarrje, ne konfirmojmë përcaktimin tonë të qartë dhe të fuqishëm që Maqedonia të pozicionohet si një vend i dijes, shkencës, kërkimit, inovacionit dhe i një ekonomie moderne e konkurruese, njoftojnë nga shtypi i qeverisë.
Si Qeveri, tha Kryeministri, marrim përgjegjësinë e plotë për të udhëhequr këtë transformim. Ky Këshill nuk është një formalitet, ai është një instrument i ndryshimit strategjik. Është mekanizmi përmes të cilit shkenca, kërkimi dhe digjitalizimi do të bëhen shtytësit kryesore të rritjes ekonomike.
“Sot bota po ndryshon me një shpejtësi të madhe. Digjitalizimi, teknologjitë e reja dhe kërkimet shkencore po përcaktojnë përparimin e kombeve. Qëllimi ynë është i qartë – të krijojmë kushte në të cilat dija do të shndërrohet në inovacion, inovacioni në produkt, ndërsa produkti në vende të reja pune dhe në një standard më të mirë jetese për qytetarët.
Vetë struktura dhe përbërja e Këshillit, i cili bashkon ministritë dhe resoret kyçe, komunitetin akademik dhe ekspertët nga fusha të ndryshme, garanton një qasje të integruar dhe strategjike në sjelljen e vendimeve. Ky trup do të sigurojë koordinim ndërmjet arsimit, shkencës, transformimit digjital dhe politikave ekonomike. Synimi ynë është që masat të jenë konsistente, transparente dhe efektive, me indikatorë të qartë dhe rezultate të matshme.
Në këtë mbledhje të parë, po miratojmë dokumentin kyç për katër vitet e ardhshme – Programin Katërvjeçar për nxitjen e Inovacioneve, Zhvillimit Shkencoro-Teknologjik dhe Sipërmarrjes. Ky program nuk është thjesht një akt administrativ. Ai është një vizion për zhvillim të bazuar në shkencë, kërkim dhe digjitalizim. Ajo krijon një kornizë mbështetëse – që nga ideja e parë, përmes zhvillimit kërkimor dhe pilotimit, deri te komercializimi i plotë.
Me këtë politikë, krijojmë bazën për hapjen e vendeve të reja të punës, cilësore dhe të paguara mirë. Duke mbështetur “start-up”-et, kompanitë teknologjike, qendrat kërkimore dhe ndërmarrjet e vogla e të mesme inovative, ne investojmë drejtpërdrejt në një ekonomi më të mirë – një ekonomi që krijon vlerë, eksporton dije dhe ndërton stabilitet afatgjatë.
Në koordinim me Ministrinë e Arsimit dhe Shkencës, Ministrinë e Transformimit Digjital dhe Ministrinë e Ekonomisë dhe Punës si krijues të politikave, Agjencia për Inovacione, Zhvillim Shkencoro-Teknologjik dhe Sipërmarrje – INOVA është implementuesi kryesor i programit. Por, suksesi nuk do të jetë rezultat i një institucioni të vetëm – por i punës së përbashkët. Qeveria, INOVA, universitetet, institutet kërkimore, sektori privat dhe sipërmarrësit duhet të veprojnë si një ekosistem i unifikuar.”, tha Mickoski./Telegrafi/
