Kryetari i komunës së Tetovës, Bilall Kasami, i pyetur për zhvillimet brenda koalicionit, tha se projekti i VLEN është shumë i rëndësishëm për shqiptarët e Maqedonisë, sepse për herë të parë shqiptarët arritën të bashkohen dhe qytetarët e vlerësuan këtë bashkim.
Ai shtoi se për këtë arsye çdo parti që është pjesë e këtij koalicioni do ta mendojë mirë dhe seriozisht veprimin e mëtejmë, qoftë edhe nëse vendos të veprojë në mënyrë të pavarur.
“Është biseduar dhe janë diskutuar edhe opsionet për zgjedhjet lokale, dhe ajo që është një dakordësi e funksionimit të deritanishëm ka të bëjë me partneritetin e plotë të të gjithë pjesëmarrësve në këtë koalicion. Besoj që mbi këto parime ky koalicion mori mandatin e qytetarëve dhe do të vazhdojë edhe më tej të funksionojë”, theksoi Kasami.
Ai u shpreh se nëse nisemi nga logjika se kush është më i fortë apo më i dobët, kush është më i mirë apo më i keq, atëherë futemi në debate për ndarje, gjë që nuk i shërben askujt.
“Ne jemi futur këtu për t’u bashkuar. Ne u bashkuam dhe qytetarët e vlerësuan këtë. Prandaj vlerësoj që koalicioni VLEN, i cili besoj se shumë shpejt mund të kalojë në një fazë më të lartë të bashkëpunimit, apo drejt shkrirjes në një strukturë të vetme politike, është ndërtuar mbi parimin e bashkimit dhe partneritetit të plotë mes anëtarëve – por edhe në partneritet me qytetarët”, shtoi Kasami.
Kasami: Besoj që koalicioni VLEN mund të shkrihet në një strukturë të vetme politike appeared first on Telegrafi.
