Kryetari i LSDM-së, Venko Filipçe sot tha se një lider i partisë politike shqiptare e ka quajtur si humbje kohe thirrjen për takimin e liderëve.
“Kam thirrur në takim të gjithë kryetarët e partive politike dhe të kujtoj, kryetari i një partie shqiptare tha se do të ishte humbje kohe dhe tani po na akuzojnë për një lloj takimi monoetnik.
Këtë e theksoi kryetari i LSDM-së, Venko Filipçe, në përgjigje të pyetjes së gazetarit lidhur me akuzat nga blloku shqiptar i partive politike se takimi i djeshëm në Qeveri me kryeministrin Hristijan Mickoski ishte plan për bashkëpunim monoetnik.
“Në atë takim kam përfaqësuar LSDM-në dhe kryeministri Hristijan Mickoski OBRM-PDUKM-në dhe jemi takuar si liderë të dy partive më të mëdha në bllokun maqedonas, në të njëjtën kohë kryeministri Mickoski ishte i pari që e pranoi ftesën për takim pa asnjë kundërshtim”, tha sot Filipçe nga Strumica.
Ai edhe një herë bëri thirrje publike për të gjitha partitë politike që të organizojnë një takim të liderëve.
Filipçe theksoi se askush nuk ka të drejtë ta akuzojë LSDM-në për politika apo qasje etnike apo nacionaliste, duke pasur parasysh se në bordin ekzekutiv të LSDM-së është një shqiptare, një grua myslimane maqedonase, ndërsa në periudhën e ardhshme do të jetë edhe një rome./Telegrafi/
Filipçe: Kryetari i një partie shqiptare tha se takimi i përbashkët ishte humbje kohe dhe tani po na akuzojnë për takim monoetnik appeared first on Telegrafi.
