“Maqedonia për fat të keq mban një rekord famëkeq në Ballkan për kohën e pritjes për fillimin e negociatave të pranimit në BE, pavarësisht se është vend kandidat që nga viti 2005”, thotë ish-ministri i Punëve të Jashtme Nikola Dimitrov, në një panel mbi zgjerimin e BE-së të mbajtur dje në Paris, Francë.
“Vendi im është një shembull famëkeq se si nuk duhet të zhvillohet procesi i zgjerimit. Ne kemi qenë në dhomën e pritjes së BE-së për më shumë se 20 vjet jo për shkak të mungesës së reformave, por jemi të bllokuar për shkak të çështjeve dypalëshe. Edhe atë jo reale, ekonomike apo territoriale, por çështje që janë më shumë metafizike – për historinë, identitetin, emrin… Me Marrëveshjen e Prespës në vitin 2018, hoqëm një nga pengesat kryesore, bllokadën e gjatë nga Greqia për shkak të mosmarrëveshjes për emrin. Por, me sa duket, kjo nuk ishte e mjaftueshme”.
“Tani kemi një sfidë me një fqinj tjetër, Bullgarinë, dhe përsëri, një mosmarrëveshje dypalëshe po qëndron në rrugën e integrimit tonë evropian”, tha Dimitrov në panelin e diskutimit “Zgjerimi i BE-së: Një Zgjedhje Strategjike”, të organizuar nga Instituti Francez i Marrëdhënieve Ndërkombëtare (IFRI).
Ai theksoi gjithashtu se në kohë sfidash të mëdha gjeopolitike, zgjerimi është një çështje stabiliteti dhe sigurie si kurrë më parë, dhe aq më tepër duhet të bëjmë të gjithë çmos për të siguruar që ky rajon të jetë i integruar.
