Organizata Botërore e Shëndetësisë ka thënë se spitali Nasser i Gazës ka dalë jshtë funksionimit pas sulmit izraelit.
Trupat e Forcave të Mbrojtjes të Izraelit (IDF) hynë në kompleks të enjten, duke thënë se inteligjenca tregoi se pengjet e marra nga Hamasi po mbaheshin atje.
OBSH tha se nuk ishte lejuar të hynte në vend për të vlerësuar situatën.
Izraeli e ka përqendruar fushatën e tij kundër Hamasit në qytetin jugor të Gazës, Khan Younis dhe ka treguar se mund të vazhdojë në jug deri në Rafah.
“Spitali Nasser në Gaza nuk është më funksional, pas një rrethimi njëjavor”, tha kreu i OBSH-së, Dr Tedros Adhanom Ghebreyesus, në X.
“Si dje, ashtu edhe një ditë më parë, ekipi i OBSH-së nuk u lejua të hynte në spital për të vlerësuar kushtet e pacientëve dhe nevojat kritike mjekësore, pavarësisht se mbërriti në kompleksin spitalor për të ofruar karburant së bashku me partnerët”, tha ai.
“Ka ende rreth 200 pacientë në spital. Të paktën 20 duhet të referohen urgjentisht në spitale të tjera për të marrë kujdes shëndetësor; referimi mjekësor është e drejtë e çdo pacienti.”
Ministria e Shëndetësisë e drejtuar nga Hamasi në Gaza thotë se vetëm katër personel mjekësor kanë mbetur në spital duke u përpjekur të kujdesen për pacientët e mbetur.
Një burim brenda spitalit, i tha BBC News se 11 pacientë kishin vdekur për shkak të ndërprerjeve të energjisë elektrike dhe oksigjenit dhe se disa mjekë ishin arrestuar.
Dje, ushtria izraelite tha se trupave të saj u ishte thënë të mbanin në punë spitalin dhe se ushqimi dhe uji ishin dorëzuar. I pyetur për gjendjen e spitalit mëngjesin e sotëm, një zëdhënës i ushtrisë tha vetëm se po kontrollonin.
Luftimet janë ndezur rreth spitalit të Nasser për javë të tëra. Izraeli ka pretenduar vazhdimisht se Hamasi po përdor spitalet, së bashku me shkollat, si baza operative.
Ushtria izraelite thotë se ka vrarë rreth 20 luftëtarë të Hamasit dhe ka sekuestruar armë të shumta në zonën e spitalit.
“Gjatë ditës së kaluar, dhjetëra terroristë u eliminuan dhe sasi të mëdha armësh u kapën,” tha IDF.
Të paktën 1200 njerëz u vranë gjatë sulmeve në Izrael nga persona të armatosur të udhëhequr nga Hamasi më 7 tetor të vitit të kaluar.
Si kundërpërgjigje, Izraeli nisi një fushatë ushtarake në Rripin e Gazës. Më shumë se 28,400 palestinezë, kryesisht gra dhe fëmijë, janë vrarë dhe më shumë se 68,000 janë plagosur që nga fillimi i luftës, sipas ministrisë së shëndetësisë të drejtuar nga Hamasi.
Ai shtoi se të paktën 127 palestinezë janë vrarë dhe 205 të tjerë janë plagosur në 24 orët e fundit./vizionplus.tv
