Ish-drejtuesja e Prokurorisë për Ndjekjen Penale të Krimit të Organizuar dhe Korrupsionit, Villma Ruskoska për rastin e “27 prillit” hyrjen me forcë në Kuvend, hodhi poshtë kategorikisht akuzat se ishte një gjyq i montuar, fshehje provash ose veprim nën diktat politik.
Sipas saj, rasti u zhvillua në bazë të provave të forta materiale, dhe vendimi u konfirmua si nga Gjykata e Apelit ashtu edhe nga Gjykata e Lartë.
“Asnjë deklaratë e asnjë dëshmitari nuk u fsheh nga mbrojtja”, tha Ruskovska, duke theksuar se avokatët kishin qasje në të gjitha provat materiale, të cilat u skanuan dhe u dorëzuan.
Ajo kujtoi se ngjarjet e “27 prillit” u dokumentuan me materiale të shumta video dhe se, siç tha ajo, “e gjithë bota i pa provat”.
Spekulimeve se mund të dalin prova të reja për të përsëritur procedurën, Ruskovska u përgjigj se është e vështirë të imagjinohen prova që do të hedhin poshtë atë që tashmë është parë publikisht.
Ish-prokurorja iu drejtua edhe kualifikimit ligjor të krimit, duke theksuar se publiku shpesh e keqinterpreton akuzën.
Sipas saj, të akuzuarit nuk u ndoqën penalisht për krimin klasik të “Terrorizmit”, por për “Kërcënim Terrorist ndaj Rendit Kushtetues dhe Sigurisë”. Ruskovska shpjegoi se këto ishin krime të ndryshme, të vendosura në kapituj të ndryshëm të Kodit Penal.
Ajo gjithashtu hodhi poshtë pretendimet se rasti u zhvillua me urdhër të qeverisë së atëhershme të LSDM-së. Si argument, ajo përmendi faktin se ishte gjatë asaj qeverie që ajo u pezullua dhe u shkarkua nga detyra, gjë që, sipas saj, tregon se ajo nuk punoi nën diktat politik./Telegrafi/
