Me dhjetë vota “për” dhe asnjë “kundër”, Propozim-ligji për ratifikimin e Marrëveshjes midis Qeverisë së Republikës së Maqedonisë së Veriut dhe Qeverisë së Mbretërisë së Bashkuar të Britanisë së Madhe dhe Irlandës së Veriut për partneritet për realizimin e projekteve infrastrukturore është miratuar në mbledhjen e Komisionit parlamentar për punë të jashtme, të udhëhequr nga deputeti Musa Xhaferi, ndërsa po sot do të kalojë në seancën e 52-të plenare të Parlamentit.
Pas marrëveshjes së arritur për një partneritet strategjik me Mbretërinë e Bashkuar midis Kryeministrit Hristijan Mickoski dhe homologut të tij britanik, Kir Stamer, që e publikuan një takimin në Tiranë më 18 maj, të mbajtur në kuadër të Samitit të Komunitetit politik evropian, Qeveria e Maqedonisë, në seancë më 20 maj e miratoi tekstin e Marrëveshjes me të cilin është definuar një partneritet për realizimin e projekteve të infrastrukturës, kurse Propozim-ligji për ratifikimin e tij u dërgua dje në Parlament.
Qëllimi i Marrëveshjes, e cila do të jetë në fuqi për 10 vjet, është të krijojë një partneritet për të mbështetur realizimin e projekteve të infrastrukturës në sektorët e transportit, shëndetësisë, teknologjisë, energjetikës dhe sektorëve të tjerë kritikë në Republikën e Maqedonisë.
Projektet e planifikuara me Marrëveshjen janë ndërtimi dhe rindërtimi i Korridorit hekurudhor 10 nga Tabanoca në Gjevgjeli, i cili, siç kumtoi Zëvendëskryeministri dhe Ministri i Transportit Aleksandar Nikolloski, duhet të kushtojë afërsisht një miliard e 900 milionë euro deri në dy miliardë euro, si dhe ndërtimi i spitalit klinik, Fakultetit të Mjekësisë dhe shtëpia studentore në Shtip, rikonstruimi i plotë i Spitalit klinik në Tetovë dhe ndërtimi i një spitali të ri me një shtëpi të re shëndetësore në Kërçovë, rreth 200 milionë euro. Fushat e bashkëpunimit janë theksuar në Aneks A, ku qëndron edhe se do të realizohen edhe programe për zhvillimin e Korridorit 8 të transportit, për zhvillimin e kapaciteteve për sigurinë kibernetike dhe transformimin digjital të Qeverisë, si dhe zhvillimin e kapaciteteve për prodhimin dhe transmetimin e energjisë elektrike.
Në tekstin e marrëveshjes së publikuar qëndron se përveç grupit fillestar të projekteve të theksuara në Aneks A, mund të përfshihen edhe projekte tjera nëse ashtu vendosin pjesëmarrësit. Në nenin 2, ku është rregulluar programi për financim, është theksuar se pjesëmarrësit do të punojnë së bashku për të identifikuar mundësitë për financimin e projekteve, duke përfshirë edhe nga Instrumenti i Mbretërisë së Bashkuar për financimin e eksportit. Përmes këtij instrumenti për vendin vihen ne dispozicion 5 miliardë funta ose 6 miliardë euro për realizimin e projekteve. Financim që do të shkojë ekskluzivisht me realizimin e projekteve.
Marrëveshja me Mbretërinë e Bashkuar miratohet në Komisionin për punë të jashtme appeared first on Telegrafi.