Kryetari i Sindikatës së Pavarur të Policisë, Martin Efremov, sot para Gjykatës Themelore Civile në Shkup ka paralajmëruar protestë të policëve për nesër, në kuadër të përpjekjeve për barazimin e praktikës gjyqësore dhe rregullimin e pagës minimale të policëve në përputhje me Ligjin për pagë minimale.
Efremov shpjegoi se paga e policëve përbëhet nga paga bazë, e cila është 30 për qind më e lartë, si dhe shpërblimet për shërbimin e kaluar. Sipas Ligjit për pagën minimale, paga bazë nuk mund të jetë më e vogël se minimalja dhe në bazë të kësaj llogariten shtesat.
“Paga bazë e policëve aktualisht është rreth 25.000 denarë, që është 1.000 denarë më shumë se paga minimale. Mirëpo, nëse e përjashtojmë atë 30 për qind, ku është baza?” thotë Efremov.
Ai shtoi se para një muaji Sindikata ka bërë ankesë kundër katër gjyqtarëve nga gjykatat e Shkupit për shkak të dyshimeve për paanshmëri, pasi kanë marrë pjesë në një seancë këshillimore në MPB.
“Ne kemi bërë kërkesë që këta gjyqtarë të përjashtohen, sepse besojmë se duan të ndryshojnë praktikën gjyqësore, të cilën tashmë e kanë konfirmuar edhe gjykatat në Manastir dhe Gostivar”, tha Efremov.
Ai po ashtu përmendi se protesta e policisë do të mbahet nesër në udhëkryqin afër Mavrovkës, ku do të jenë të pranishëm edhe sindikatat nga Evropa dhe Ballkani. Protesta do të nisë në orën 12:00 dhe do të përfundojë para Këshillit Gjyqësor rreth orës 13:00, me mesazhin se ligji duhet të zbatohet për të gjithë.
Sindikata e Pavarur e policisë së Maqedonisë nesër proteston për paga më të larta appeared first on Telegrafi.