Kryetari ASH-së dhe ministri i Shëndetësisë, Arben Taravari, ka uruar koalicionin VLEN për shkrirjen në një parti dhe u ka uruar suksese. Ai thotë se është shumë i lumtur që tri partitë nga blloku shqiptar janë shkrirë në një.
“Ne si Aleancë do të dalim me listat tona dhe me shumë mundësi edhe me kandidatët tanë për kryetar bashkie. Tani për tani nuk kemi vendim se nuk jemi pjesë e (grupit parlamentar të VLEN). Nëse do të inicohet, ne kemi pesë deputetë tanë dhe ata do të vazhdojnë si grup parlamentar dhe VLEN do të ketë grupin e vet parlamentar”, tha sot Taravari.
Ai ka sqaruar se është kundër mbajtjes së zgjedhjeve të parakohshme parlamentare. Sipas Taravarit, ka një shumicë të qëndrueshme qeverisëse, pavarësisht nëse Aleanca e tij është pjesë e Qeverisë.
“Mendoj se duhet të ketë zgjedhje lokale. Për ne është e rëndësishme që në zgjedhjet lokale të dalim me rezultate sa më të mira dhe ky është qëllimi ynë, të fitojmë sa më shumë komuna”, shtoi Taravari.
Ai tha se në ditët në vijim do të takohet me kryeministrin Hristijan Mickoski. Nuk ka një datë të saktë, por ata do të jenë në komunikim sapo kryeministri të kthehet nga Spanja./Telegrafi/
Taravari: Ne si ASH do të dalim me lista dhe kandidatë tonë në zgjedhjet lokale, gëzohem që VLEN u bë një parti appeared first on Telegrafi.
