Komisioni Shtetëror për Parandalimin e Korrupsionit ka konstatuar një sërë mangësish në Ligjin për veprimtari hoteliere, pas inspektimit pas tragjedisë në Koçan ku humbën jetën 61 persona. Ndër të tjera, KSHPK-ja ka konstatuar se objektet e hotelerisë janë duke u regjistruar pa verifikuar paraprakisht nëse i plotësojnë kërkesat minimale teknike të nevojshme, gjë që mund të ketë pasoja për shëndetin dhe sigurinë e vizitorëve.
“KSHPK rekomandon që ligji të parashikojë detyrimin për paraqitjen e pëlqimit me shkrim nga Inspektorati Shtetëror i Punës ose një autoritet tjetër kompetent, i cili do të konfirmojë plotësimin e kushteve minimale teknike përpara regjistrimit në regjistër. Është e nevojshme të parashikohet detyrimi për ISHP për të kryer inspektim brenda një periudhe të caktuar, p.sh. 15 ditë, si dhe sanksione në rastin e raportimit të rremë, duke përfshirë mundësinë e gjobës ose miratimin”, tha kryetarja e KSHPK-së, Tatjana Dimitrovska.
Në vend të një ftese për edukim, duhet të ketë masa inspektimi si paralajmërim, gjobë ose ndalim. KSHPK gjithashtu ka identifikuar një rrezik në fushën e dispozitave kundërvajtëse që nuk janë proporcionale me peshën e pasojave të mundshme.
“Në këtë pjesë rekomandojmë rishikimin e dispozitave për kundërvajtje me qëllim që të sigurohet proporcionaliteti në mes të lartësisë së gjobave dhe peshës së pasojave, veçanërisht për shkeljet që kanë të bëjnë me shëndetin dhe sigurinë e njerëzve. Gjithashtu është e nevojshme të aplikohet shuma e trefishtë e gjobës për kundërvajtje të rënda”, shtoi Dimitrovska.
Raporti për shqyrtimin e Ligjit për veprimtari hoteliere, si dhe ligjeve për mbrojtjen dhe shpëtimin, për mbikëqyrjen inspektuese, për vetëqeverisjen lokale, për mbrojtjen nga lëndët plasëse dhe për tregtimin e lëndëve plasëse do të shpallet publikisht dhe do t’i dorëzohet propozuesit dhe institucioneve që i zbatojnë dhe rregullojnë këto ligje./Telegrafi/
Anti-korrupsioni konstaton mangësi të shumta në Ligjin për veprimtari hotelierike appeared first on Telegrafi.
