Rreth 90 persona kanë vdekur në SHBA për shkak të motit të ashpër që ka goditur shumë shtete javën e kaluar.
Të paktën 25 persona humbën jetën në Tenesi dhe 16 në Oregon, i cili mbetet në gjendje të jashtëzakonshme pas stuhive të forta.
Dhjetëra mijëra njerëz mbeten gjithashtu pa energji në zona të mëdha të vendit. Ngricat pritet të vazhdojnë deri në mesin e javës.
Ndërsa numri i vdekjeve ishte më i lartë në Tenesi dhe Oregon, vdekjet janë raportuar në Illinois, Pensilvani, Misisipi, Uashington, Kentaki, Wisconsin, Nju Jork, Nju Xhersi dhe zona të tjera.
Në një incident në Portland, Oregon të mërkurën e kaluar, tre persona u goditën nga rryma kur erërat e forta shkaktuan rënien e një linja elektrike dhe goditën automjetin me të cilin po udhëtonin. Një foshnjë në automjet mbijetoi.
Vdekje të tjera mbeten nën hetim, duke përfshirë një person të vrarë në një aksident me pesë makina në Kentucky, ndërsa katër të tjerë vdiqën në Illinois.
Pesë persona – shumica e të cilëve besohej se ishin të pastrehë – vdiqën në vetëm katër ditë në Seattle, sipas Associated Press. /vizionplus.tv
