Policia Rrugore e Pogradecit ka zbardhur ngjarjen e ndodhur një ditë më parë në aksin rrugor “Korçë-Pogradec”.
Florant Palla, 40 vjeç u gjet i pajetë në rrugë. 40-vjeçari u aksidentua nga një automjet ndërsa drejtuesi i makinës u largua nga vendi i ngjarjes së bashku me automjetin e tij.
Pas hetimeve dhe kontrolleve intensive duke përdorur dron dhe dylbi, policia bëri të mundur identifikimin e automjetit dhe drejtuesit të tij.
Gentjan Capo, 38 vjeç u arrestua, ndërsa makina e tij u sekuestrua.
“Në vijim të informacionin paraprak të dhënë ditën e djeshme, ku në aksin rrugor “Korçë-Pogradec”, tek vendi i quajtur “Ura e Leshnicës”, u gjet i pajetë shtetasi F. P. 40 vjeç dhe paraprakisht u dyshua për aksident rrugor, grupi hetimor nën drejtimin Prokurorisë vijoi veprimet hetimore për identifikimin e drejtuesit të mjetit, që shkaktoi aksidentin.
Pas një pune intensive të bërë nga Sektori i Policisë Rrugore, që nga mbrëmja e djeshme me këqyrje te kamerave qe ndodheshin ne aksin rrugor Korçë-Pogradec, kontrolle me dron dhe dylbi të territorit te fshatrave dhe zonave të banuara përreth vendndodhjes se aksidentit dhe informacioneve të marra ne rruge operative, u bë e mundur që rreth rreth orës 16:40, të lokalizohej nëpërmjet dronit automjeti tip “Volkswagen” i përfshirë në këtë ngjarje rrugore.
Gjithashtu u identifikua dhe drejtuesi i automjetit shtetasit G. C., 38 vjeç, banues në fshatin Gështenjas, Pogradec
Shërbimet e Policisë kapën dhe shoqëruan në Komisariat shtetasin G. C., i cili u arrestua për veprat penale ” Shkelja e rregullave të qarkullimit rrugor” dhe “Largim nga vendi i aksidentit”, njoftoi policia./vizionplus.tv
