Barcelona ka marrë një goditje të madhe në përgatitjet për sezonin 2025-26, pasi turneu i tyre në Japoni dhe Korenë e Jugut është vënë në dyshim gjatë 24 orëve të fundit.
Vitin e kaluar u njoftua se Barça do të kthehej në Azi këtë verë për fazën përgatitore, pas disa verërave radhazi në Shtetet e Bashkuara. Ishin planifikuar ndeshje në Japoni dhe Korenë e Jugut, me të parën, kundër Vissel Kobe, që ishte caktuar për këtë fundjavë.
Megjithatë, gjasat që kjo ndeshje të zhvillohet janë tashmë shumë të vogla, pasi Barcelona ka konfirmuar zyrtarisht se turneu parasezonal në Azi është pezulluar:
“FC Barcelona njofton se është detyruar të pezullojë pjesëmarrjen në ndeshjen e planifikuar për të dielën e ardhshme në Japoni, për shkak të shkeljeve serioze kontraktuale nga ana e organizatorit.”
“Megjithatë, Klubi do të shqyrtojë riorganizimin e fazës së turneut në Korenë e Jugut, ku janë planifikuar dy ndeshje ndaj FC Seoul (31 korrik) dhe Daegu FC (4 gusht), nëse plotësohen disa kushte nga organizatori. Nëse këto kushte përmbushen, atëherë Klubi do të udhëtojë drejt Koresë së Jugut në ditët në vijim. FC Barcelona shpreh keqardhje për këtë incident dhe ndikimin që do të ketë tek shumë tifozë të Barçës në Japoni.”
Kjo do të thotë se tifozët e Barcelonës ka gjasa të mos i shohin menjëherë në fushë përforcimet e reja, si Joan Garcia dhe Marcus Rashford, i cili u zyrtarizua të mërkurën. Të dy mund të duhet të presin deri javën e ardhshme për të debutuar me fanellën blaugrana.
Ka ende një mundësi që ndeshja ndaj Vissel Kobe të zhvillohet, por vetëm nëse kërkesat e Barcelonës përmbushen menjëherë. Në të kundërt, ajo do të anulohet – dhe nëse vazhdon i njëjti problem edhe për pjesën në Korenë e Jugut, atëherë katalanasit do ta zhvillojnë pjesën tjetër të përgatitjeve në shtëpi.
Turneu parasezonal i Barcelonës në Japoni e Kore të Jugut mund të dështojë, mësohet arsyeja / shkruan Gazeta Online Reporteri.net.
