Lille nuk e ka gjetur ende një klub blerës serioz për Edon Zhegrovën.
Ylli kosovar është duke ushtruar i vetëm pasi u la jashtë skuadrës së parë në përgatitjet për sezonin e ri.
Drejtuesit e klubit francez janë të interesuar ta shesin përfaqësuesin kosovar, i cili nuk ka pranuar ta vazhdojë kontratën, e cila do t’i skadojë në verën e vitit 2026.
Mirëpo, për momentin nuk ka një interesim konkret për anësorin e djathtë, njoftojnë mediat franceze, përcjell “Gazeta Express”.
Gjatë janarit Napoli i kishte ofruar 20 milionë euro për kartonin e tij, ndërsa klubi francez kërkonte më shumë dhe tash Lille është bërë pishman që s’e ka shitur lojtarin në atë kohë.
Klubi i Kuq tash do të ishte i gatshëm ta shiste ish-futbollistin e Baselit për 20 milionë euro, ndonëse vlera e tij në Transfermarkt është 25 milionë.
Tash, interesimi i Napolit dhe i Milanit është zbehur, ndërsa për të thuhet se informacione ka kërkuar klubi tjetër italian, Atalanta.
Edhe në Angli thuhet se e pëlqejnë Nottinghami dhe Newcastle, ndërsa në Turqi Fenerbahçe.
Sidoqoftë, Lille nuk ka marrë ende ofertë serioze për 26 vjeçarin, i cili në pjesën e parë të sezonit ishte yll i ekipit.
Shkaku i lëndimit, Zhegrova nuk ka luajtur që nga 14 dhjetori dhe ky fakt i ka trembur paksa ekipet e interesuara, të cilat thuhet se gjithnjë e më shumë po largohen prej tij.
Prishtinasi i kishte zhvilluar 21 ndeshje dhe i kishte realizuar 8 gola, ndërkohë që i kishte bërë edhe 2 asistime në pjesën e sezonit.
Përfaqësuesi kosovar i ishte bashkuar Lillet nga Baseli në vitin 2022, ndërsa ka hyrë në vitin e fundit të kontratës së tij.
Lille po kërkon blerës serioz, i kërkon 20 milionë euro për Zhegrovën / shkruan Gazeta Online Reporteri.net.
