Federata Shqiptare e Futbollit ka përgënjeshtruar kategorikisht një lajm të shpërndarë së fundmi nga një media online me bazë në Zvicër, që pretendon se tifozët shqiptarë nga Kosova janë të përjashtuar nga ndeshja Shqipëri–Serbi, që luhet më 7 qershor në stadiumin “Arena Kombëtare”.
“Ky informacion është krejtësisht i pavërtetë dhe abuziv. FSHF-ja i ka dërguar një komunikim zyrtar medias në fjalë dhe është në pritje të një përgjigjeje formale.
Sqarojmë se procesi i shitjes së biletave për ndeshjen Shqipëri–Serbi do të kryhet përmes një sistemi transparent dhe të hapur për të gjithë tifozët, pa asnjë diskriminim apo përjashtim” thuhet në njoftimin zyrtar të FSHF-së.
Nga Federata bëjnë me dije se aplikimi për bileta do të nisë më 15 maj, përmes një formulari elektronik që do të publikohet në faqen zyrtare të FSHF-së.
“Afati i aplikimit do të zgjasë dy javë dhe në fund të muajit maj do të zhvillohet një short kompjuterik, për të përzgjedhur tifozët që do të kenë të drejtën të blejnë biletat. Të përzgjedhurit do të njoftohen me email.
FSHF mbetet e përkushtuar ndaj një organizimi dinjitoz të ndeshjes dhe fton të gjithë tifozët shqiptarë, kudo që ndodhen, të ndjekin me besim komunikimet zyrtare dhe të mos bien pre e lajmeve të rreme” përfundon njoftimi.
FSHF-ja përgënjeshtron raportimet se tifozët nga Kosova janë përjashtuar prej ndeshjes Shqipëri-Serbi / shkruan Gazeta Online Reporteri.net.
