Për shkak se avokati ka revokuar autorizimin, ka dështuar të mbahet seanca fillestare të mërkurën në Gjykatën Themelore në Pejë në rastin ku gjudisti Akil Gjakova akuzohet për dhunë në familje.
Kështu konfirmoi për “Betimi për Drejtësi“, zëdhënësja e Gjykatës Themelore në Pejë, Elzana Kastrati.
“Seanca e shqyrtimit fillestar ndaj të pandehurit A.GJ, e paraparë të mbahet sot në ora 09:00, nuk është mbajtur për shkak se mbrojtësi i të pandehurit e ka revokuar autorizimin”, ka thënë ajo.
Prokuroria Themelore në Pejë më 14 dhjetor 2024 ka ngritur aktakuzë ndaj Akil Gjakovës, të cilin e ngarkon për “Dhunë në familje”.
Kujtojmë se sipas kërkesës së Prokurorisë thuhej se nga kallëzimi penal i parashtruar nga Stacioni Policor në Pejë dhe provat tjera të bashkëngjitura, qëndron dyshimi i bazuar se i pandehuri Akil Gjakova, kishte kryer veprën penale “Dhunë në familje”. Aty thuhej se që nga viti 2023 i pandehuri ishte duke e keqtrajtuar psiqikisht të dëmtuarën-bashkëshorten, duke ushtruar edhe dhunë fizike një herë ndaj të njëjtës, e cila kishte deponuar edhe disa fotografi që tregojnë lëndime të shumta trupore, e për të cilat nuk ka marrë fare tretman mjekësor.
Po ashtu, përmenden edhe mesazhet denigruese që pretendohet se i pandehuri ia ka dërguar të dëmtuarës dhe dhuna e vazhdueshme psikike ndaj saj dhe se më 13 prill thuhet se ajo bashkë me fëmijën u detyrua të qëndrojë në strehimore pasi Gjakova ia kishte mbyllur derën e shtëpisë dhe i kishte shkruar sms se gjësendet do t’ia dërgojë tek familja e saj. Detajet nga Dosja mund t’i gjeni: KËTU.
Gjakova ishte ndaluar në prill 2024 në pikën kufitare në Morinë, pasi ishte shpallur në kërkim nga Policia e Kosovës, për veprën penale “Dhunë në familje”.
Dështon të nisë gjykimi për dhunë në familje ndaj Akil Gjakovës / shkruan Gazeta Online Reporteri.net.
