Kryetari i Bashkisë së Tiranës, Erion Veliaj, ka përcjellë një mesazh urimi për Krishtlindje nga burgu, duke iu drejtuar besimtarëve dhe qytetarëve përmes një postimi në rrjetin social Instagram.
Në mesazhin e tij, Veliaj thekson se vigjilja e festave është një kujtesë se drita triumfon gjithmonë mbi errësirën dhe se shpresa mund të lindë edhe në momentet më të vështira. Ai bën thirrje për më shumë dashuri, mirëkuptim dhe besim mes njerëzve, duke nënvizuar rëndësinë e bashkimit për të përballuar sfidat.
Kryebashkiaku shprehet se shpresa duhet mbajtur gjallë, pasi, sipas tij, kur njerëzit janë bashkë, çdo vështirësi mund të shndërrohet në një mundësi. Në urimin e tij, Veliaj dëshiron që çdo familje të ndiejë ngrohtësinë e bashkimit, çdo zemër të mbushet me paqe dhe që Viti i Ri të sjellë më shumë forcë, solidaritet dhe vendosmëri për të ndërtuar një të ardhme më të mirë.
Mesazhi i Veliajt:
Kjo vigjilje festash na kujton se drita gjithmonë fiton mbi errësirën dhe se shpresa lind edhe në momentet më të vështira. Le të jetë Krishtlindja një ftesë për më shumë dashuri, më shumë mirëkuptim dhe më shumë besim te njëri-tjetri. 
Uroj që çdo familje të ndjejë ngrohtësinë e bashkimit, që çdo zemër të mbushet me paqe dhe që Viti i Ri të na gjejë më të fortë, më solidarë dhe më të vendosur për të ndërtuar një të ardhme më të mirë për të gjithë.
Le ta mbajmë ndezur shpresën, sepse kur jemi bashkë, çdo sfidë mund të kthehet në mundësi. Gëzuar Krishtlindjen dhe një vit 2026 plot dritë e optimizëm! 
