Qarku Shkodër raporton një situatë të qetë deri në orën 19:00, pavarësisht reshjeve të dëborës në disa zona malore dhe bllokimeve të përkohshme të qarkullimit.
Bashkia Shkodër – Situata paraqitet e qetë dhe nuk ka problematika të raportuara. Në zonat malore ka reshje të herëpashershme dëbore, por pa krijuar vështirësi, ndërsa akset rrugore janë të kalueshme normalisht.
Bashkia Malësi e Madhe – Edhe kjo bashki raporton një situatë stabile, pa reshje shiu apo dëbore në pjesën më të madhe të territorit. Në Vermosh ka mungesë të pjesshme të energjisë elektrike, ndërsa ekipet e OSHEE-së po punojnë për rikthimin e furnizimit. Autoritetet kanë kërkuar vëmendje të shtuar nga patrullat e policisë rrugore për të mos lejuar qarkullimin e mjeteve pa goma dimërore ose zinxhirë, sipas situatës në terren.
Për rreth 3 orë, reshje të dendura dëbore kanë rënë në Bogë dhe Qafë-Thorë, duke shkaktuar bllokim të përkohshëm të qarkullimit. Prej afro një ore qarkullimi është rikthyer në normalitet, ndërsa policia vijon monitorimin për sigurinë e mjeteve.
Bashkia Vau Dejës – Situata mbetet e qetë dhe pa problematika të raportuara.
Bashkia Pukë – Deri në këto momente nuk raportohet asnjë problematikë.
Bashkia Fushë-Arrëz – Në këtë zonë vijojnë reshjet e shiut me intensitet mesatar, ndërsa mbi 930 metra lartësi reshjet janë në formë dëbore. Deri tani nuk ka raportime për bllokime rrugësh ose situata emergjente.
Autoritetet mbeten në gatishmëri për çdo ndërhyrje të mundshme, ndërsa situata në qark paraqitet përgjithësisht nën kontroll.
