Ngjarja e rëndë që ndodhi këtë të martë në Vlorë, ku një qen i racës pitbull kafshoi një të mitur, ka shkaktuar shqetësim të madh mbi menaxhimin e kafshëve në qytet.
Fatmirësisht, vajza është stabilizuar dhe tashmë ka dalë nga spitali, por fati i kafshës vazhdon të mbetet i paqartë. Burime të sigurta thonë se qeni është vrarë përmes eutanazisë, por mungesa e informacionit zyrtar ka nxitur reagime të forta nga shoqatat për mbrojtjen e kafshëve.
Avokatja Adriana Kalaja ishte sot në Prokurorinë e Vlorës, ku denoncoi Bashkinë e Vlorës dhe zyrën e veterinarisë për keqtrajtimin e kafshëve dhe për mungesën e një plani të qartë për menaxhimin e situatave të tilla.
Kalaja: Kam ardhur për një ngjarje të rëndë që ka ndodhur para dy ditëve, ku një qenush vetëm 4 muajsh, përflitet sepse nuk kemi asnjë provë konkrete nga institucionet përgjegjëse që ka sulmuar një vajzë 4-vjeçare. Dua ta theksoj faktin që për ne ka rëndësi që fëmija është mirë, gëzon shëndet të plotë, lëndimet janë sipërfaqësore dhe nuk ka asgjë serioze në trupin e fëmijës. Shikoni vetë se çfarë propagande bëhet ndaj një qënieje të pambrojtur. Është shumë shpejt për të thënë se kush është fajtori, dhe për këtë ligji ka përcaktuar organet ligjzbatuese se kush e provokoi ngjarjen, çfarë ka ndodhur dhe cilat jkanë masat që kanë marrë institucionet përgjegjëse.
Sipas Kalasë, shëndeti i qytetarëve dhe i fëmijëve mbetet prioritet, por vrasja e kafshëve nuk mund të jetë zgjidhje, veçanërisht kur ato nuk paraqesin rrezik të vazhdueshëm.
Kalaja: Ne kemi informacion që është po i njëjti veteriner që ka ekzekutuar një qenush 4 mujor, që sipas provave ka qenë shumë miqësor, nuk ka kryer kurrë veprime agresive dhe mbi të gjitha po tentohet të manipulohet ngjarja. E gjithë ngjarja po manipulohet me qëllim për të justifikuar abuzoimet që janë bërë me fondet e qenve endacakë, fonde që jepen për vaksinim dhe sterilizim. As ne si kafshëdashësh nuk duam që qentë e rrugës të jenë të pangrëmë, të pavaksinuar dhe të patrajnuar në raport me njerëzit në rrugë. Kallëzimi që unë do bëj sot ka të bëjë më kryetaren e bashkisë, veterinerin dhe drejtoreshën e bujqësisë pranë institucionit, të cilët përveçse e kanë pranuar që kanë kryer veprën penale duhet ta na tregojnë çfarë ka ndodhur me mijëra qen endacakë.
Ajo shtoi se fondet e konsiderueshme që ndahen për vaksinimin dhe sterilizimin e kafshëve nuk po përdoren efektivisht në terren, pasi Bashkia nuk kryen asnjë funksion konkret.
Avokatja ngriti dyshime për abuzime me fondet dhe detyrën, duke paralajmëruar se kallëzimi i depozituar në prokurori do të ndiqet me prioritet, me synim të sigurohet zgjidhje e drejtë për jetën e qytetarëve, por edhe për mbrojtjen e kafshëve.
