Autoritetet italiane në bashkëpunim me SPAK kanë goditur një grup kriminal italo-shqiptar që pastronte para përmes një rrjeti restorantesh në Itali.
Hetuesit italianë kryen 23 kontrolle të hënën në restorantet në qendër të Firences. Ata përdorën gjithashtu qen të stërvitur për të kërkuar kartëmonedha. Si rezultat i kërkimeve u sekuestruan mbi 400 mijë euro cash nga shtëpitë, zyrat dhe kasafortat bankare.
Policia me një dekret kontrolli të nënshkruar nga prokurorja antimafia Christine von Borries, zhvilloi kontrolle në tetë restorante, zyra dhe shtëpi të dy të dyshuarve kryesorë, që konsiderohen si “kokat” e shoqatës kriminale, shqiptari Eluert Kamami, 40 vjeç dhe fiorentini Alessandro Bigi, 49 vjeç, president prej disa muajsh i klubit të futbollit Ischia.
Hetimet
Policia po punon për të bërë të mundur analizimin e gjithë dokumentacionit të sekuestruar. Fillimisht do të kontrollohen celularët dhe kompjuterët.
Restorantet e përfshira
Tetë restorantet e shënjestruar janë restoranti Cavallino dhe Orcagna, të dy në Piazza della Signoria, Trattoria Giovanni në via Sant’Agostino, Bistecca në Piazza della Repubblica, Trattoria Ponte Vecchio në Lungarno Archibusieri, Bisteccheria në Santaro C. Trattoria de’ Pitti në Piazza Pitti, Osteria Lungarno në Lungarno Corsini. Ka shumë të tjera nën lupën e hetuesve, gjithsej janë bërë 23 kërkime.
Sipas akuzës së prokurorit, organizata ka blerë ose marrë me qira ambiente në qendrën historike pjesërisht me para nga administrimi i paligjshëm. Komploti kriminal me qëllim përvetësimin, vetëpastrimin dhe përdorimin e parave me origjinë të paligjshme janë akuzat që rëndojnë ndaj anëtarëve të grupit.
Perandoria e vendasve
Duke filluar nga viti 2012 e deri më sot, grupi ka arritur të krijojë një perandori të vërtetë të përbërë nga restorante, bare, dyqane akulloresh, një hotel, dhe dy fabrika birre. Tridhjetë e një aktivitete me një investim prej 13.5 milionë euro. Hetimi do të duhet të hedhë dritë se si janë blerë strukturat, duke pasur parasysh edhe faktin se dy sipërmarrësit, kur nisën “pazarin” për restorantet, nuk kishin burimet financiare.
Të dy deri në vitin 2014 kanë deklaruar të ardhura rreth 20 mijë euro. Nga vjen ai lum i parave? Hetimet kanë konstatuar se nga viti 2022 deri në vitin 2024 dy sipërmarrësit, me ndihmën e bashkëpunëtorëve të tjerë që punonin në restorante të ndryshme, nuk lëshonin kupona tatimore për një pjesë të mirë të shërbimeve, duke i derdhur më pas paratë, të marra çdo ditë nga ambientet, në një arkë të përbashkët të disponueshme për të dy në restorantin Cavallino.
Ajo rezervë parash, sipas prokurorisë, është përdorur për të paguar në mënyrë të paligjshme punonjësit e restoranteve, për të vazhduar fushatën e blerjeve në qendër të Firences por edhe për të blerë makina luksoze, bizhuteri dhe diamante.
Gjatë viteve 2023 dhe 2024, dy sipërmarrësit do të kishin blerë 14 restorante dhe bare dhe, janarin e kaluar, 50 për qind të aksioneve të klubit sportiv të futbollit Ischia. Në hetim është përfshirë edhe Pino Taglialatela, ish-portieri i Napolit dhe Fiorentinës./vizionplus.tv
