Kryeministri Edi Rama ditën e sotme mori pjesë në ceremoninë e nderimit të Profesor Hubert Hasenauer, rektorit të Universitetit të BOKU në Austri, me Yllin për Mirënjohje Publike.
Profesori vlerësohet për kontributin dhe përkushtimin e tij në transformimin e UBT (Universitetit Bujqësor të Tiranës) sipas modelit të BOKU të Vjenës, në rrugën e njehsimit të diplomave mes tyre.
Rama tha se ky është një moment simbolik që nxjerr edhe një herë në pah lidhjen mes Austrisë dhe Shqipërisë.
Rama: Ky duhet të jetë rasti i parë kur dikush shkon të marrë një medalje dhe nga fjalët e rastit merr dy. I dashur profesor, i nderuar miku im dhe mik e koleg i të pranishmëve, unë besoj se kjo e sotmja nuk është thjesht një ceremon nderimi për një individ që e meriton plotësisht këtë nderim, por është edhe një moment simbolik që rinxjerr në pah lidhjen mes dy traditash të vjetra, dhe jo të vogla, austriake dhe shqiptare, në një spirale të përbashkët vlerash si dija, përkushtimi dhe dashuria për tokën, e vetë njeriut.
Nuk do të mjaftonte dot hapësira e një fjale të tillë për të përshkruar të gjithë këtë rrugëtim sat ë shkurtër aq edhe kuptimplotë që na lidh së bashku por pata dëshirë sot i nderuar professor t’ju them se ju i bashkoheni një kostelacioni yjesh që nga Austria kanë xixëlluar mbi qiellin e Shqipërisë. Ne kur të duam të duam pa kushte, dhe të duam dhe me pahir. Nuk ke nga lëviz fare. Sot ju jeni një tjetër xhevahir në vargun e gjatë të gjerdanit të miqësisë dhe të lidhjes së Shqipërisë me Austrinë.
