Mbrëmje magjike në MARINA ORIKUM në Natën e Dytë të Festivalit “MARE MEUM”, ku në skenë performuan live një kuartet harqesh me Suela Piciri në violinë, e cila është edhe violiniste e Teatrit “La Scala” të Milanos, Laura Llozi në violin dhe Albana Kola violë, Dorina Laro në violonçel.
Gjatë kësaj mbrëmje në Marinën e Orikumit u interpretuan kryevepra botërore të muzikës klasike nga autorë të ndryshëm si Hayden, Bethoven e Puçini.
Kështu pra pas koncertit të parë i zhvilluar në Zvërnec, MARE MEUM FESTIVAL, një projekt muzikor i mbështetur edhe nga Concord Investment, vjen në Marina Orikum duke ngjallur një interes të jashtëzakonshëm te publiku i gjerë vlonjat por edhe ai i huaj.
Festivali i cili zhvillohet për herë të parë në qytetin bregdetar të Vlorës, është konceptuar si një udhëtim në kohë përmes tingujve dhe natyrës, teska janë përzgjedhur peizazhe mbreslënëse të Vlorës në 4 koncerte të ndryshme.
Për Drejtorin Artistik të Festivalit Maestro Aulon Naçi, “MARE MEUM” është mirëpritur nga artdashësit shqiptarë dhe ata të huaj.
““Mare Meum” sepse do të thotë “deti im” dhe jo më bukur se në Vlorë mund të gjendet bashkimi i dy deteve dhe deti është ai që na frymëzon. Nga çdo pikë e qytetit të Vlorës deti duket dhe pikërisht zgjodha këtë vend për të bërë këtë buqetë koncertesh, me katër koncerte në qytetin e Vlorës. Vlora ka shumë nevojë për aktivitete të tilla dhe sa më shumë të jenë aq më mirë është, qoftë për faktin sepse është një qytet me potencial shumë të madh turistik, por edhe për vetë qytetarët të cilët si dhe vetë turistët presin verën për të pasur okazione dhe evente të tilla, për tu njohur me artin dhe me kulturën dhe për të njohur dhe potencialin e muzikantëve, të cilët shpesh janë me origjinë nga Vlora ose nga Shqipëria, por që jetojnë dhe studiojnë jashtë dhe kthehen në vendlindje për të dhënë një kontribut”, tha Naçi.
Mbrëmja koncertore e së dielës në ambientet e Marina Orikum kishte pjesë të saj një publik të gjerë duke filluar nga njerëz të artit dhe të kulturës, ndërkohë që nuk munguan edhe personalitete të qeverisjes lokale duke filluar nga Bashkia dhe Qarku i Vlorës.
Pas këtij koncerti në Marinën e Orikumit, skena e “Mare Meum” Festival do të zhvendoset në Teatrin Petro Marko dhe më pas tek Petrolifera e Vlorës, teksa janë rreth 70 muzikantë të ndryshëm të cilët do të interpretojnë vepra të autorëve të mirënjohur shqiptarë dhe të huaj.
Mare Meum Festival, ka çelur siparin e tij më 16 gusht dhe do të përfundojë më 06 shtator 2024 dhe mbështetet fuqimisht nga Bashkia Vlorë dhe Instituti Italian i Kulturës por edhe nga ana e biznesve siç edhe është në këtë rast Concord Investment dhe Marina Orikum të cilat vazhdojnë të jenë pjesë vitale e aktiviteteve artistike në Shqipëri falë mbështetjes që vazhdimisht ofrojnë.
/vizionplus.tv
