Krimi Kibernetik ka arrestuar në flagrancë një 35-vjeçar i cili pasi i vodhi llogarinë në “Instagram” një shtetasi, i kërkoi 40 mijë euro në mënyrë që të mos t’i publikonte mesazhet.
Gazetari i Vizion Plus, Esido Barkaj mëson se në pranga ka rënë shtetasi Arion Hyseni.
Hyseni u arrestua në flagrancë në momentin që do të merrte paratë.
Po vijon puna për të identifikuar dhe nxjerrë përpara përgjegjësisë penale, shtetas të tjerë që dyshohet se kanë bashkëpunuar me 35-vjeçarin, për këtë rast.
Policia ka sekuestruar 7 celularë, 2 disqe dhe 1 USB.
Denoncimi
Një 31-vjeçar kishte denoncuar se ishte shantazuar nëpërmjet celularit, për dhënien e një shume të konsiderueshme parash.
Pas denoncimit, Drejtoria për Hetimin e Krimeve Kibernetike në Departamentin e Policisë Kriminale në DPPSh, në bashkëpunim me Drejtorinë e Forcës së Posaçme Operacionale dhe me Prokurorinë e Tiranës, finalizoi operacionin policor të koduar “Double click”.
Në njoftimin zyratr të policisë thuhet se Hyseni ka kanosur nëpërmjet celularit, 31-vjeçarin, për t’i marrë 40 000 euro, në këmbim të mospublikimit të komunikimeve personale që i kishte gjetur në llogarinë që i kishte vjedhur, në rrjetin social Instagram./vizionplus.tv
