Viktimat e aksidentit tragjik në Këlcyrë ishin me origjinë nga Pakistani. Polica thotë se 3 prej tyre janë identifikuar, ndërsa për identifikim e plotë të 4 shtetasve të tjerë po punohet ende.
Personat që humbën jetën ishin të moshave nga 28-32 vjeç. Bashkë me emigrantët, në aksident humbi jetën edhe 24-vjeçari shkodran Edison Bregaj, i cili ishte shoferi i “Benz-it”.
Policia ka arrestuar dy persona Agustin Gjepa, 24 vjeç dhe Ramazan Dekovi, 24 vjeç, të akuzuar për dhënje ndihme të kalimit të kufirit.
Gjithashtu në kërkim është shpallur S. N., 23 vjeç, banues në Shkodër, pasi dyshohet se kishte rolin e organizatorit në këtë veprimtari kriminale. Vijon puna për kapjen e këtij shtetasi.
“Si rezultat i veprimeve hetimore të kryera për zbardhjen e rrethanave të aksidentit të ndodhur ditën e djeshme, në aksin rrugor “Këlcyrë-Përmet”, si pasojë e të cilit humbën jetën 8 shtetas, si dhe bazuar dhe në informacionet e siguruara nga inteligjenca policore, në kuadër të një hetimi proaktiv për zbardhjen e linjës së trafikimit dhe kontrabandimit të emigrantëve, është dokumentuar se 7 shtetasit nga Vendet e Treta që humbën jetën nga ky aksident po transportoheshin nga drejtuesi i këtij automjeti, nga kufiri grek drejt kufirit të Shkodrës, kundrejt pagesës, me qëllim kalimin e paligjshëm të kufirit.
Nga këto veprime, të kryera nga strukturat e DVP Gjirokastër, në bashkëpunim me Sektorin e Trafiqeve në Departamentin e Policisë Kriminale në DPPSH dhe me strukturat e DVP Shkodër, në drejtimin e Prokurorisë së Gjirokastrës, dyshohet se drejtuesi i automjetit, shtetasi E. B., po bashkëpunonte me 3 shtetas të tjerë, për transportimin e 7 emigrantëve nga Pakistani, të moshave 28-32 vjeç, 3 prej të cilëve janë identifikuar”, thuhet në njoftim.
/vizionplus.tv
