Departamenti i Arsimit në takimin e punës me liderin e opozitës, Sali Berisha, paraqiti planin për hartimin e Programit të Arsimit dhe të Kërkimit Shkencor për vitet 2025-2029, i cili është përgatitur nga specialistë të arsimit, pedagogë e mësues, studentë, përfaqësues të grupeve të interesit si dhe me mbështetjen e ekspertëve të huaj të politikave të sistemit edukativ dhe të kërkimit shkencor.
Berisha vuri theksin tek rritja e fondeve për kërkimin shkencor dhe rritjen e domosdoshme të pagave të arsimtarëve dhe pedagogëve.
“Duhet të jetë program që të shënojë një kthesë të madhe në trendin aktual të rënies së lirë të arsimit në Shqipëri. Ky program i cili duhet të fillojë me ciklin parashkollor dhe të përfundojë me ciklin pasuniversitar. Do të ketë mbështetjen më të fuqishme financiare nga qeveria e ardhshme”, tha Berisha.
Ai u zotua se do të rrisë rrogat e arsimtarëve dhe në mandatin e parë nuk do të ketë rroga nën 1mijë e 300 euro në arsimin shqiptar.
“5 % e buxhetit është zotimi im solemn, dyfishim dhe objekt drejt trefishimit të rrogave të arsimtarëve. Në mandatin e parë nuk do të ketë rrogë nën 1mijë e 300 euro në arsimin shqiptar. Nuk do të ketë rrogë nën 2 mijë euro në universitetet e vendit”, tha Berisha.
Gara e dijes është gara më e pandalshme por gara më e sigurt që sjell zhvillimin tërësor të një vendi dhe një kombi, theksoi ish-kryeministri.
“Pa kërkim shkencor universitetet nuk mund të ekzistojnë. Pa arsimin profesional shoqëria nuk i përgjigjet dot kërkesave të tregut dhe do të lëvizet me shpejtësi në të gjitha këto drejtime. Ne në synimet dhe objektivat tona do të shndërrojmë sistemin arsimor në promotor kryesor të transformimit të vendit. Ne synojmë një arsim i cili jo vetëm të edukojë vlerat më të larta të lirisë dhe qytetërimit por edhe dijet më të arrira të fushave më të reja”, tha Berisha.
Më tej ai shtoi se kërkimi shkencor sot nuk ekziston.
“A mund të imagjinoni ju universitete pa kërkim shkencor, por asgjë nuk e konsolidon universitetin më shumë se kërkimi shkencor. Dhe tani pothuajse janë inekzistente.
Nuk kanë qenë kurrë. Me vjen keq ta them këtë. Edhe në diktaturë, në çdo kohë të saj. Fakultetet kishin fondin e kërkimit shkencor. Kjo që ka ndodhur është një mënzyrë e vërtetë por unë shoh se programi në vija të përgjithshme u jep përgjigje këtyre çështjeve kryesore”, përfundoi ai./vizionplus.tv
