Një moment që supozohej të ishte thjesht pjesë e argëtimit në koncertin e grupit të famshëm britanik Coldplay në Boston, u shndërrua në një skandal publik, pasi kamera e transmetimit live kapi një situatë të ndjeshme në ekranin gjigant.
Në qendër të vëmendjes u gjend Andy Byron, CEO i kompanisë amerikane të teknologjisë ‘Astronomer’, i cili u filmua në një moment të afërt dhe të përzemërt me Kristin Cabot, shefen e burimeve njerëzore të kompanisë së tij. Pamjet u transmetuan live për gjithë publikun në koncert – dhe shumë më gjerë në rrjetet sociale.
Problemi? Byron është i martuar dhe baba i disa fëmijëve, të cilët – sipas mediave amerikane – ndodheshin në shtëpi në atë kohë.
Situata u bë edhe më e sikletshme kur vetë vokalisti i Coldplay, Chris Martin, bëri një koment me humor para mijëra njerëzve: “Shikoni këta të dy… Oh, ose kanë një aferë, ose janë thjesht shumë të turpshëm”.
Reagimet e dy të filmuarve vetëm sa shtuan dyshimet: Byron u përkul i tensionuar, ndërsa Cabot u kthye nga ana tjetër, e turpëruar.
Pas koncertit, pamjet filluan të qarkullojnë me shpejtësi në rrjete sociale, duke kthyer momentin në një nga memet më të përfolura të ditës, dhe duke ngritur pyetje serioze rreth etikës profesionale dhe jetës private të një prej drejtuesve të një kompanie të njohur teknologjike.
As Byron dhe as Cabot nuk kanë bërë ende një deklaratë publike, ndërsa interneti po bën të vetën… në mënyrën më virale të mundshme.
Skandal në koncertin e Coldplay: Kamera kap aksidentalisht një CEO të martuar në një “moment intim” me punëtoren e tij / shkruan Gazeta Online Reporteri.net.
