Ish-konkurrentja e “Për’puthen”, Antonela Berisha, është përfshirë sërish në një situatë të diskutueshme në rrjete sociale, pas një komenti të hedhur në profilin e saj nga një ndjekëse nga Peja.
Komentuesja i rikujtoi episodin e bujshëm të vitit të kaluar, kur Antonela u përfshi në një përplasje fizike me Klea Prengën gjatë një debati publik, ngjarje që më vonë Berisha e justifikoi si një përpjekje për të mbrojtur motrën e saj. Komenti përmendte faktin që ajo nuk ishte ndëshkuar për atë incident dhe e lidhte këtë me mungesën e drejtësisë në Shqipëri.
Pas këtij reagimi, Antonela i është drejtuar ndjekëses përmes mesazheve private, ku ka përdorur gjuhë fyese dhe kërcënuese, duke i kërkuar asaj takim për të “sqaruar situatën”. Përmes disa mesazheve të dërguara, ajo e fton ndjekësen të përballet me të dhe në disa raste i referohet me tone denigruese, madje ka bërë deklaratë skandaloze.
“Ju ka dhunuar serbi… më zi do të ta bëj”, thuhet ndër të tjera në mesazhe.
Ndjekësja në fjalë është shprehur për JOQ Albania se nuk kishte asgjë personale ndaj Antonelës, por komentoi si çdo përdorues tjetër në rrjet, dhe nuk e kishte pritur një reagim kaq ekstrem.
Kjo përplasje e fundit ka nxitur reagime të shumta në publik, duke vënë në pikëpyetje mënyrën se si figurat publike menaxhojnë kritikën dhe rolin e tyre në ndërtimin e një diskursi më të matur në rrjetet sociale.
Në të kaluarën, Antonela ka qenë pjesë e debateve të shumta mediatike, por ngjarja e fundit duket se ka riaktivizuar shqetësimin për mënyrën se si ajo i adreson mospajtimet dhe reagimet publike.
“Ju ka dhunuar serbi, më zi do të ta bëj”, dalin mesazhet skandaloze të Antonela Berishës me një ndjekëse nga Kosova / shkruan Gazeta Online Reporteri.net.
