Një gotë lëng frutash në ditë mund të ndihmojë në plotësimin e nevojave ditore për fruta dhe perime, por nuk mund të zëvendësojë frutat e plota.
Ky është përfundimi i një studimi të kryer nga Universiteti i Newcastle në Britaninë e Madhe, në një kohë kur konsumi i frutave dhe perimeve në Europë mbetet nën nivelet e rekomanduara të OBSH.
Studiuesit analizuan ndikimin e lëngjeve të frutave në dietë dhe mirëqenien mendore dhe vunë re se personat që konsumuan çdo ditë një gotë lëng frutash 100% natyral ose rritën konsumin e frutave dhe perimeve arritën më lehtë rekomandimin e ekspertëve për pesë porcione në ditë. Ata shfaqën gjithashtu përmirësime të lehta në simptomat e depresionit.
Sipas studiuesve, çmimet e larta të produkteve të freskëta dhe vështirësia për t’i ruajtur ato bëjnë që shumë njerëz të mos konsumojnë 400 gram fruta dhe perime të freskëta, që është norma ditore e rekomanduar nga ekspertët e shëndetësisë botërore.
Megjithatë, ekspertët paralajmërojnë se lëngu i frutave nuk duhet të zëvendësojë frutat e plota pasi gjatë përpunimit humbet një pjesë e fibrave dhe lëndëve ushqyese të rëndësishme, ndërsa përmbajtja e sheqerit mbetet e lartë.
Për këtë arsye, nutricionistët rekomandojnë që frutat e plota të mbeten zgjedhja kryesore, ndërsa një gotë e vogël lëng frutash 100% natyral mund të përdoret si plotësues i dietës së përditshme.
