Ndoshta nuk i shohim, por hormonët janë “dirigjentët” e padukshëm të trupit tonë. Ata vendosin se si ndihemi, sa energji kemi, si reagojmë ndaj stresit, madje edhe kë kujtojmë apo dashurojmë.
Çdo ndryshim i vogël hormonal mund të ndikojë tek humori, pesha, gjumi dhe dëshirat tona më të thella.
Truri dhe hormonet: lidhja që na drejton pa e kuptuar
Në tru, hipotalamusi dhe hipofiza janë si qendra kontrolli që dërgojnë sinjale për gjithë trupin. Kur je i stresuar, ato nxisin prodhimin e kortizolit, hormonin e stresit. Ai të ndihmon të përballosh situata të vështira, por kur qëndron i lartë për shumë kohë, sjell lodhje, shtim në peshë dhe ankth. Nga ana tjetër, dopamina dhe serotonina janë “hormonët e lumturisë”. Ato ndikojnë në motivim, humor dhe madje edhe në mënyrën si e shohim botën. Kur janë në ekuilibër, ndihesh i qetë dhe energjik; kur bien, gjithçka duket më e errët.
Hormonet që ndikojnë në trup dhe marrëdhënie
Tek gratë, estrogjeni dhe progesteroni ndikojnë jo vetëm në ciklin menstrual, por edhe në mënyrën si ndihen gjatë muajit, nga energjia te ndjeshmëria emocionale. Tek burrat, testosteroni është i lidhur me forcën fizike, dëshirën seksuale dhe vetëbesimin. Një ekuilibër i shëndetshëm hormonal përkthehet në humor stabil, oreks normal dhe gjumë të mirë. Ndërsa çrregullimet hormonale shpesh janë arsyeja e padukshme pas lodhjes kronike, shtimit të peshës apo ndryshimeve të papritura në humor.
Si t’i mbajmë në ekuilibër
Gjumi i mirë, aktiviteti fizik, ushqimi me bazë natyrale dhe shmangia e stresit janë “ilaçi” më i thjeshtë për t’i mbajtur hormonet në balancë. Trupi është inteligjent, mjafton t’i japim kushtet e duhura që të rregullojë vetë ekuilibrat e tij.
