Astrologe Meri Gjini ka bërë parashikimin e horoskopit për javën në emisionin “Mes’dritë”, në Vizion Plus, me dyshen e moderatorëve Alma Çelaj dhe Syrjan Rahova.
E nisim javën me Mërkurin në të kundërt, mbi Marsin te Shigjetarët. Një shenjë e zjarrtë, ky bashkim nuk ndihmon shumë në lëvizje, në agjendën turistike, apo në agjendën e udhëtimeve të secilit.
Ky Mërkur do të qëndrojë te Shigjetarët deri në datën 19; në datën 20 vazhdon retrogradë te Akrepët, por aty merr një natyrë krejt ndryshe.
Kujdes tonacionin dhe, nëse mundeni, rregulloni agjendën në punë. Nëse keni udhëtime të gjata, merrni parasysh që ato mund të anulohen ose të shtyhen.
Planetet marrin natyrën e shenjës ku ndodhen, prandaj në këtë rast nuk ka asnjë tolerim për të marrë rreziqe.
Dashi
Ky bashkim planetar ndodh në një shenjë shumë miqësore në energji me Dashin. Ky Mërkur bashkë me Marsin do të sjellë korrigjime të drejtpërdrejta në anën profesionale, ku ka pasur ngecje dhe vështirësi. Ngarkesat e këtij Mërkuri lidhen me komunikimin në çift ose në familje; mund të lindin keqkuptime.
Demi
Nuk është hyrje miqësore dhe favorizuese, por do të bëjë të mundur që me kolegët dhe personat në punë të ketë një lloj sqarimi. Venusin do ta kenë përballë dhe kjo i ndihmon shumë të mos e prishin terezinë nga mendimi i njerëzve në vendin e punës. Ky Venus gjithashtu ju ndihmon për njohje dhe lidhje të reja, ku mund të merrni përfitime të merituara.
Binjakët
Mërkuri në të kundërt mbi Marsin përballë tyre bën që të lindurit në 10-ditëshin e parë të shenjës të kenë një nervozizëm të brendshëm. Këtë e shprehin që sot dhe katërditëshin e parë të javës. Kujdes me nervozizmin, kanalizojani Mërkurit në të kundërt për të ruajtur ekuilibrat. Nëse jeni të kthjellët dhe të qetë, ky Mars me Mërkurin mund të sjellë në skenë çështje profesionale që nuk i keni mbaruar më parë – mund t’ju jepet një mundësi e dytë. Sa më të qetë të jeni, aq më shumë mundësi do të keni.
Gaforrja
Jupiterin e kanë në orët e para të paradites te Gaforrja. Hija e Jupiterit në të kundërt në datën 12 ju bën të ndiheni sikur ecni mbrapsht, por do të ndihmojë ata që nuk kanë pasur guximin apo mundësinë gjatë kohës që ishte në të drejtë, që nga data 10 qershor. Është korrigjues ky Jupiter. Një shqetësim dhe një problem mund të zgjidhen vetëm me mënyrën e këndvështrimit, këndvështrimi juaj do të përcaktojë rezultatin final. Emocionalisht nuk do t’ju mungojë suporti dhe dashuria. Nuk është koha për shpenzime.
Luani
Marsi te Shigjetarët është shumë favorizues në aspektin profesional. Deri në datën 20 korrigjoni, organizoni dhe ribashkëpunoni situatat dhe ambientet në punë. Mund të ketë keqkuptime dhe përplasje, por Luanët kanë vendosur t’i përfundojnë gjërat me pozitivitet.
Virgjëresha
Mërkuri është planeti i tyre drejtues. Që në momentin e parë të tranzitit u shfaqen vështirësitë. Ky Mërkur ka të bëjë me lëvizjen, me komunikimin dhe me mënyrën e reagimit emocional në ambiente familjare. Kontrolloni komunikimin në çështje familjare që duket se kanë qenë edhe më parë aty dhe ju kanë lodhur. Venusi te Akrepat sjell zgjerim social ose shkëmbim borxhesh të mbartura.
Peshorja
Pavarësisht se Mërkuri në të kundërt do të bëjë që të gjendeni në situata jo fort të qeta në punë, duhet të shfrytëzoni shansin për të zhvilluar veten dhe emrin tuaj në profesion. Situatat që ndodhin rreth e qark do t’ju bëjnë të ndodheni në momentin dhe vendin e duhur për të zgjeruar bazën tuaj profesionale. Venusi sjell një komoditet që aspekti emocional të merret në kontroll në çdo rast.
Akrepi
Është në një pozicion shumë të rëndësishëm për ta ky Mërkur. Duhet të keni vëmendjen të drejtuar në raportin në çift dhe në familje. Ky Venus te ata nxit nevojën për t’u harruar nëpërmjet shpenzimeve, por kujdes nuk është koha për shpenzime të pakontrolluara. Ky Mërkur ka tendencë për të rikthyer situata të së kaluarës, njerëz që kanë qenë dikur në jetën tuaj. Por ju e dini çfarë emocioni do të shkëmbeni me ta. Nëse keni për të firmosur, lexojeni dy herë kontratën.
Shigjetari
E kanë te vetja hyrjen e Mërkurit me Marsin jo shumë komode. E gjeni veten në mes të dy katërkëndëshave. Duhet të jeni të maturuar, të qetë dhe të kontrolloni emocionet. Mënyra se si do të shpreheni dhe do të vetëkontrolloheni do të përcaktojë edhe fatin tuaj. Ata që janë të kujdesshëm do të marrin maksimumin; të tjerët do të ndihen sikur po përsërisin gabimet e veta. Mësoni nga vetja juaj.
Bricjapi
Kanë një bashkim që do të funksionojë si pastrues. Ose do të qartësojnë situata pune, ose mendimet e tyre për lëvizje profesionale, ose do të pastrojnë veten nga shoqëri apo miqësi që kanë qenë të lodhshme dhe që janë detyruar t’i mbajnë. Do të hapni hapësirë për energji pozitive. Venusi te Akrepat ju ndihmon të gjeni sigurinë dhe të shtoni në agjendën tuaj hobi dhe gjëra kreative. Në punë, momenti për gjëra të reja është më shpejt nga ç’prisni.
Ujori
Me këtë Mërkur në të kundërt do ta gjeni veten duke u përpjekur të qartësoni se kush jeni. Duhet të jepni sqarime dhe do të harxhoni shumë energji për të ripozicionuar veten. Kjo do t’ju lodhë gjatë javës. Mbyllni pagesat dhe detyrimet në banka që të mos keni probleme më vonë.
Peshqit
Te vetja kanë Saturnin dhe në katërkëndësh kanë Mërkurin. Situatat nuk janë të lehta në çështjet profesionale. Nuk është periudhë e rekomanduar për nisje të reja në profesion. Nëse keni mundësi, lëvizjet në raport me punën shtyjini. Kushtoni rëndësi punës dhe shëndetit.
/vizionplus.tv
