Imagjino sikur koha është si një portofol i mbushur me para që harxhohet çdo ditë, qoftë në mënyrë të zgjuar ose në mënyrë të pakujdesshme. Çdo minutë që kalon është një monedhë e shpenzuar që nuk kthehet më…
Por si mund ta përdorim kohën më mirë dhe të ndalojmë së humburi atë me gjëra të parëndësishme?
Ja disa taktika me të cilat mund të filloni për të përmirësuar aftësinë e menaxhimit të kohës:
1. Vendos prioritete të qarta
Fillimi i mbarë është gjysma e punës, por të dish se çfarë është më e rëndësishme për të bërë është thelbi i një jete produktive. Mbaj një listë të detyrave, të organizuar sipas parimit të 80/20: përqendrohu te 20% e gjërave që sjellin 80% të rezultateve.
Në vend që të shpërndash energjinë kudo, përqendroji përpjekjet te ato gjëra që do të kenë ndikim më të madh në jetën dhe karrierën tënde.
2. Përcakto një afat për detyrat
Shumë prej nesh humbasin kohë sepse kalojmë nga një detyrë në tjetrën pa një strukturë të qartë. Këtu hyn në lojë teknika “Pomodoro”: Vendos një alarm për 25 minuta dhe përqendrohu tërësisht te një detyrë. Pastaj bëj një pushim të shkurtër 5-10 minuta. Rifillo përsëri të punosh për 25 minuta të tjera.
Kjo metodë ndihmon të qëndrosh i përqendruar dhe të shmangësh shpërqendrimet që të vjedhin minutat.
3. Mos bëj shumë gjëra në të njëjtën kohë
Edhe pse duket sikur po bën më shumë duke u marrë me disa detyra njëherazi, e vërteta është e kundërta: multitasking-u ul produktivitetin dhe të bën më pak efektiv.
Përqendrohu në një detyrë në një afat kohor të caktuar dhe jepi gjithë vëmendjen tënde. Kur ta përfundosh, kalo në detyrën tjetër me energji dhe qartësi mendore.
4. Merr kohën e duhur për të pushuar
Kjo mund të duket aspak produktive, por pushimi i planifikuar është thelbësor për të qenë më produktiv. Kur je gjithmonë “në punë”, truri yt lodhet dhe fillon të bëjë gabime. Cakto orare për pushime të shkurtra ose aktivitete që të çlodhin. Do të shohësh se si të rritet energjia dhe përqendrimi, citon Anabel.
Koha është e vetmja gjë që nuk mund ta rikuperojmë, prandaj është koha për të marrë kontrollin. Me këto taktika të thjeshta, mund të ndalosh së humburi minutat e vlefshme dhe të fillosh të investosh zgjuar. Në fund të fundit, nuk ka asgjë më të çmuar se koha që përdoret mirë – dhe asgjë më të keqe se të kesh ndjesinë se ke humbur një ditë të tërë pa bërë asgjë “vërtet të dobishme”.
