Praktikat e pandershme të BDI-së gjatë 20 viteve të saj në pushtet, ku shqiptarët janë mbajtur peng me kontrata në vepër, të shfrytëzuar dhe të manipuluar për vota tani po marrin fund, kështu thuhet në komunikatën e koalicionit VLEN.
“Ky është një shembull i qartë i keqpërdorimit të shqiptarëve dhe i shtytjes për të mbështetur interesa të kësaj partie deri sa ishte në pushtet, duke krijuar një sistem të varësisë që ka dëmtuar zhvillimin dhe mirëqenien e tyre. Ne koalicioni VLEN besojmë se shqiptarët nuk duhet të jenë të shantazhuar dhe të mbahen peng për vota. Këto praktika që BDI ka instaluar gjatë këtyre viteve, janë një plagë e rëndë që ka lënë një pasojë të thellë në shoqërinë shqiptare. Ata kanë keqpërdorur të drejtën e punës për të manipuluar nevojtarët dhe punëtorët e ndershëm duke krijuar një sistem klientelist që ka siguruar jetëgjatësi politike, por ka lënë pas zhvillimin e shtetit dhe mirëqenien e qytetarëve. Koalicioni VLEN është angazhuar të ndryshojë këtë situatë dhe të japë një mundësi të re për ata që janë mbajtur të pasigurt dhe të shfrytëzuar. Ne do po u sigurojmë atyre punë dhe mundësi për zhvillim, duke u siguruar që çdo individ të ketë të drejtat e tij të garantuara nga ligji për marrëdhënie pune. Askush nuk do të jetë më një mjet manipulimi për qëllime politike. Çdo person do të trajtohet në përputhje me ligjin dhe do të ketë mundësinë për një jetë dinjitoze dhe të sigurt”, thonë nga VLEN.
Ata shtojnë se VLEN është gjithashtu e angazhuar për avancimin e ligjit për përfaqësim të drejtë dhe adekuat.
“Ky ligj është në fazën finale të hartimit dhe do të sjellë një sistem më të drejtë dhe më të barabartë për të gjithë qytetarët pa dallim, duke siguruar që çdo individ të ketë mundësinë të kontribuojë në shoqëri dhe të ketë mundësi të zhvillohet profesionalisht pa pasur frikë se do të manipulohet apo shantazhohet. Ne e kemi të qartë që qytetarët shqiptarë meritojnë më shumë dhe ne do të punojmë fort për t’u siguruar që ata të kenë mundësinë për të jetuar në një shtet të drejtë dhe të zhvilluar”, thuhet në komunikatën e VLEN-it.
VLEN: Jemi të angazhuar për avancimin e ligjit për përfaqësim të drejtë dhe adekuat appeared first on Telegrafi.
