Kryetarja e Kuvendit të Serbisë, Ana Bërnabiq, ka pritur sot një delegacion nga qeveria e Maqedonisë së Veriut.
Ata konkluduan se do të fokusohen në realizimin e projekteve dhe nismave specifike me synim integrimin e mëtejshëm dhe përmirësimin e marrëdhënieve dypalëshe, të cilat, sipas tyre, do të ndihmojnë stabilitetin dhe prosperitetin rajonal.
Delegacioni i Maqedonisë së Veriut përbëhej nga zëvendëskryeministri dhe ministri i marrëdhënieve ndërmjet komuniteteve Ivan Stoilkoviq, zëvendëskryeministri dhe ministri i transportit dhe lidhjeve Aleksandar Nikoloski dhe ministri i Punëve të Jashtme dhe Tregtisë së Jashtme Timco Mucunski.
Bërnabiq tha se Maqedonia e Veriut gjithmonë mund të llogarisë në mbështetjen dhe partneritetin e sinqertë nga Serbia.
Palët diskutuan mundësitë për zhvillimin e mëtejshëm të lidhjeve miqësore duke u mbështetur në historinë e përbashkët dhe lidhjet e ngushta kulturore, thuhet në deklaratën zyrtare.
Duke vënë theks të veçantë në bashkëpunimin parlamentar, ata thanë se janë të kënaqur që në Kuvendin e Maqedonisë është krijuar grup për miqësi ndërmjet Maqedonisë së Veriut dhe Serbisë.
Bërnabiq theksoi rëndësinë e Maqedonisë së Veriut si partner ekonomik i Serbisë si në tregtinë e jashtme ashtu edhe në bashkëpunimin për investime.
Ata diskutuan gjithashtu protokollin e nënshkruar në Shkup për të mundësuar krijimin e një tregu të liberalizuar të punës si pjesë e nismës Ballkani i Hapur, i cili do të ndihmojë në përmirësimin e mjedisit të biznesit dhe trajtimin e problemit të mungesës së fuqisë punëtore, thuhet në deklaratë.
Stoilkoviq tha se është i kënaqur që bashkëpunimi po forcohet dhe theksoi se lidhjet e forta dhe të përhershme mes dy popujve paraqesin një bazë solide për avancimin e mëtejshëm të bashkëpunimit në të gjitha nivelet.
Stoilkoviq, Mucunski dhe Nikolloski në takim tek Bërnabiq: Lidhja RMV-Serbi më e fortë dhe e përhershme appeared first on Telegrafi.
