Agjencia për Mbështetjen dhe Promovimin e Turizmit pushon së ekzistuari si institucion i pavarur dhe do të jetë pjesë e Ministrisë së Kulturës dhe Turizmit, gjë që u zyrtarizua me ndryshimet në Ligjin për Turizmin që u miratuan dje në Kuvend.
Tridhjetë punonjës të Agjencisë do të transferohen në sektorin e turizmit të Ministrisë së Kulturës, i cili do të ketë edhe ambiente të reja për të cilat nuk do të paguhet qira si më parë në Qendrën Tregtare të Qytetit.
“Të gjitha procedurat dhe të gjithë punonjësit do të transferohen në një adresë, që është Ministria e Kulturës dhe Turizmit. Shpresoj që pas tetë ditësh pas botimit në Gazetën Zyrtare, do të vazhdojmë me marrjen në dorëzim të punonjësve, pronës, gjithçkaje që është në pronësi të Agjencisë për Mbështetjen e Turizmit. Të gjitha adresat do të drejtohen vetëm në një institucion dhe nuk do të paguhet më qira, e cila paguhej nga Agjencia për Mbështetjen e Turizmit në QTZ, por kemi siguruar edhe kushte të reja hapësinore – dy katet e para në ndërtesën që tani përdoret nga Ministria e Energjisë. Në mënyrë që edhe këtu kostot të ulen, të kemi kushte shumë më të përshtatshme, një vend më qendror, më shumë dukshmëri dhe, më në fund, tani po vazhdojmë plotësisht si Ministri e Kulturës dhe Turizmit”, deklaroi Ministri i Kulturës, Zoran Ljutkov.
Me ribalancin e buxhetit të parashikuar për Agjencinë për Mbështetje të Turizmit, në Ministrinë e Kulturës dhe Turizmit do të derdhen shtesë 605 milionë denarë, ose rreth 10 milionë euro. Këto mjete do të përdoren për mbështetje dhe promovim të kulturës dhe turizmit, për aktivitete në Pllaoshnik, Kalaja e Shkupit, për Agjencinë e Filmit dhe të tjera./Telegrafi/
Shuhet Agjencia për Promovimin e Turizmit, 30 të punësuarit transferohen në Ministrinë e Kulturës appeared first on Telegrafi.