Zjarri që shpërtheu pasditen e djeshme në Gërçishtë të Vallandovës është riaktivizuar sërish në orët e mëngjesit të sotëm, i nxitur nga era e fuqishme dhe temperaturat e larta. Sipas Qendrës për Menaxhim me Kriza (QMK), flakët kanë përfshirë një sipërfaqe të madhe dhe janë përhapur në dy drejtime kryesore — njëri drejt fshatrave Kazan Doll dhe Furka, dhe tjetri drejt Komunës së Bogdancit.
Në përpjekjet për shuarjen e zjarrit janë angazhuar mbi 50 persona nga terreni. Kryetari i Komunës së Vallandovës, Pero Kostadinov, ka kërkuar ndihmë ajrore për përballimin e situatës, mirëpo nga Ministria e Punëve të Brendshme (MPB) është informuar se për arsye teknike nuk është e mundur të sigurohet mbështetje me helikopter.
QMK gjithashtu ka paraqitur kërkesa për ndihmë edhe te Drejtoria për Mbrojtje dhe Shpëtim (DMSH), por deri në pasditen e sotme nuk ka pasur ndonjë përgjigje. Paralelisht, një kërkesë është dërguar edhe në Shtatmadhorinë e Armatës për mundësinë e përfshirjes së forcave ajrore dhe pritet përgjigje nga ana e tyre.
Në njoftimin e QMK-së theksohet se bëhet fjalë për një zjarr serioz që ka kapluar një zonë të gjerë me vendbanime të shpërndara, duke paraqitur rrezik të madh për jetën dhe shëndetin e banorëve, si dhe për objektet, pronën dhe infrastrukturën në zonën e prekur.
QMK: Zjarri në rajonin e Vallandovës nuk është vendosur ende nën kontroll, po përhapet në dy krahë appeared first on Telegrafi.
