Eurodeputeti bullgar Andrei Kovaçev konfirmoi informacionin se me kërkesë të tre partive më të mëdha në Parlamentin Evropian – Partisë Popullore Evropiane (PPE), Aleancës Progresive të Socialistëve dhe Demokratëve (S&D) dhe “Obnova”, fjalët “gjuhë maqedonase” dhe “identitet maqedonas” do të hiqen nga draft-raporti i progresit për Maqedoninë e Veriut.
Ai, siç njofton “BGNES” thotë se temat e identitetit dhe gjuhës nuk kanë vend në raportin e progresit të një vendi që aplikon për anëtarësim në BE.
“Tema të tilla çojnë vetëm në përçarje dhe hapin kutinë e Pandorës. Kjo konfirmohet në këtë rast të veçantë nga deklaratat e vazhdueshme të zyrtarëve qeveritarë në Shkup, dhe veçanërisht nga kryeministri Mickoski me manipulimet e tij rreth ‘identitetit dhe gjuhës shekullore’.
Qëllimi i pamaskuar i autoriteteve në Shkup ishte, në prag të zgjedhjeve lokale, të tregonin një triumf të pabesueshëm mbi ‘fqinjin lindor’ dhe në këtë mënyrë të shpjegonin pse do të bënin disa ndryshime kozmetike në Kushtetutën e tyre dhe do të përfshinin pjesërisht bullgarët në të.
Pavarësisht presionit dhe lobimit të paparë, një precedent i tillë nuk duhet të bëhet pjesë e raporteve të Parlamentit Evropian apo të ndonjë institucioni tjetër evropian. Në vend të kësaj, Republika e Maqedonisë së Veriut duhet të respektojë marrëveshjen e nënshkruar me Bullgarinë dhe të zhbllokojë punën e komisionit për histori. Atje duhet të diskutohen temat e historisë sonë të përbashkët, siç është shkruar në marrëveshje”, shkruan Kovaçev në Facebook.
Për këtë reagoi edhe kryeministri i RMV-së, Hrisitijan Mickoski i cili tha se heqja e fjalëve “gjuhë maqedonase” dhe “identitet maqedonas” nga draft-raporti për Maqedoninë është po aq e keqe sa të ishte përfshirë edhe termi “modern”./Telegrafi/
Kovaçev: Temat mbi identitetin dhe gjuhën nuk kanë vend në një raport mbi një vend që aplikon për anëtarësim në BE appeared first on Telegrafi.
