6 liderët e Ballkanit Perëndimor, përfshirë Kryeministrin Edi Rama, janë mbledhur në Londër, ku pritet të marrin pjesë në Samitin e Procesit të Berlinit.
Një ditë para këtij takimi të nivelit të lartë, liderët e Ballkanit u pritën nga Mbreti Charles III, ndërsa ishin të shoqëruar edhe nga Kryeministri britanik Kier Starmer, i cili do të drejtojë dhe panelet në samit.
Vetë Kryeministri Edi Rama ndau edhe disa pamje të takimit me Mbretin Charles, ndërsa shihen duke bashkëbiseduar.
Në samit diskutohen tri çështje kryesore: emigrimi, siguria e rajonit, si dhe bashkëpunimi ekonomik. Punimet do të nisin me pritjen e liderëve nga Kryeministri Starmer dhe do të pasohen me një foto familjare. Më pas do të nisin diskutimet, teksa seanca e parë plenare do të nisë menjëherë pas fotos.
Samiti do të jetë i organizuar në dy panele me temë “Ambicia dhe Vizioni Strategjik” dhe “Rritja, Migrimi dhe Siguria”, në të cilat do të mbajë një fjalë edhe Kryeministri Edi Rama.
Në përfundim, udhëheqësit e gjashtë vendeve të Ballkanit Perëndimor do të nënshkruajnë deklarata të përbashkëta për Tregun e Përbashkët Rajonal dhe bashkëpunimin energjetik.
Procesi i Berlinit, i cili nisi nga qeveria gjermane në vitin 2014, është një platformë ndërkombëtare që bashkon qeveritë e 6 vendeve të Ballkanit Perëndimor, së bashku me partnerë të tjerë evropianë. Qëllimi është të rrisë bashkëpunimin rajonal, të mbështesë zhvillimin ekonomik dhe të përshpejtojë përpjekjet për një afrim më të ngushtë evropian në Ballkanin Perëndimor.
/vizionplus.tv
