Katër trupa u gjetën sot nga ekipet e shpëtimit pasi një varkë me emigrantë u mbyt në lumin Drina që ndan Serbinë nga Bosnja, thanë autoritetet.
Shumë persona janë ende të zhdukur pasi në varkën që u përmbys ndodheshin të të paktën 25 emigrantë.
Varka u përmbys afër qytetit kufitar serb të Ljubovia herët në mëngjes, tha policia serbe.
Serbia, e cila kufizohet me katër vende anëtare të Bashkimit Evropian, është një nga vendet kryesore në “rrugën ballkanike” përmes së cilës kalojnë emigrantët që përpiqen të arrijnë në BE
“Këto katër trupa janë gjetur afër Serbisë, përgjegjësinë për to e ka marrë policia serbe. Ekipi ynë po vazhdon hetimet”, tha për mediat lokale Boris Trninic, kreu i shërbimit rajonal të mbrojtjes civile në Bosnjë dhe Hercegovinë.
Në qershor, Serbia nënshkroi një marrëveshje me agjencinë evropiane të rojeve kufitare Frontex për të forcuar “bashkëpunimin operacional” midis BE-së dhe vendeve të Ballkanit.
Kjo zonë është një pikë kalimi për migrantët që duan të arrijnë në Evropën Perëndimore.
Pothuajse 100,000 migrantë përdorën “rrugën ballkanike” në 2023 krahasuar me 144,000 në 2022, sipas Frontex. Agjencia regjistroi vitin e kaluar të paktën 20,000 të mitur të pashoqëruar në këtë rrugë.
Dhjetëra emigrantë kanë vdekur vitet e fundit duke u përpjekur të kalonin Drinën, një lumë i madh që formon një kufi natyror midis Serbisë dhe Bosnjës.
Të paktën një milion emigrantë, me origjinë nga vendet aziatike dhe afrikane, kanë kaluar në Serbi që nga viti 2015, një numër i madh i tyre në vitin 2015 gjatë valës së madhe të refugjatëve nga Lindja e Mesme, sipas qeverisë serbe.
Policia lokale regjistroi afro 10,400 hyrje të paligjshme në vend nga janari deri në qershor 2024, një rënie prej gati 70% krahasuar me të njëjtën periudhë të vitit të kaluar. Këta ishin kryesisht sirianë, afganë, turq, marokenë dhe pakistanezë./vizionplus.tv
