Forcat e Armatosura të Ukrainës kanë kryer një seri sulmesh të koordinuara ndaj objektivave strategjikë rusë, duke goditur një depo nafte në rajonin Krasnodar të Federatës Ruse, tre ura në territoret e pushtuara nga Rusia dhe një instalim radari në Krime.
Lajmi është bërë i ditur nga Shtabi i Përgjithshëm i Forcave të Armatosura të Ukrainës përmes një njoftimi zyrtar në rrjetet sociale.
Sipas autoriteteve ukrainase, gjatë natës së 25 qershorit, njësitë ushtarake ukrainase goditën depon e naftës “Poltavska” në rajonin Krasnodar, një objekt që, sipas Kievit, përdoret për furnizimin me karburant të trupave ruse në territoret e pushtuara të Ukrainës.
Pas sulmit është raportuar shpërthimi i një zjarri në zonën e objektit. Kjo është hera e dytë brenda pak ditësh që depoja e naftës bëhet objektiv i sulmeve ukrainase.
Në të njëjtën kohë, ushtria ukrainase njoftoi se ka goditur tre ura të rëndësishme logjistike të përdorura nga forcat ruse për transportin e trupave dhe municioneve. Bëhet fjalë për një urë rrugore mbi lumin Korshak në rajonin e Zaporizhias dhe dy ura hekurudhore mbi lumenjtë Aidar dhe Luhanchik në rajonin e Luhanskut.
Gjithashtu, sipas njoftimit, është goditur edhe një instalim radari në Krime, territor i aneksuar nga Rusia në vitin 2014.
