Rusia dhe Ukraina njoftuan sot se kanë shkëmbyer 230 robër lufte, duke përfshirë ushtarë rusë të kapur gjatë ofensivës ukrainase në rajonin e Kurskut.
“Pas një procesi negocimi, 115 ushtarë rusë të kapur në rajonin e Kurskut u larguan nga territoret e kontrolluara nga regjimi i Kievit. Në këmbim, 115 të burgosur të forcave të armatosura ukrainase u liruan”, njoftoi Ministria ruse e Mbrojtjes.
Ministria sqaroi se ushtarët rusë janë tani në Bjellorusi.
“Sot 115 të tjerë mbrojtës tanë janë kthyer në shtëpitë e tyre”, konfirmoi nga ana e tij presidenti ukrainas Volodymyr Zelensky, ndërsa falënderoi Emiratet e Bashkuara Arabe që kanë vepruar si ndërmjetës për të arritur këtë marrëveshje.
Ky shkëmbim i të burgosurve, si shumë të mëparshëm, u arrit falë ndërmjetësimit të Emirateve, të cilat komentuan se janë “një ndërmjetës i besueshëm në mbështetje të diplomacisë për zgjidhjen e krizës mes dy vendeve”.
Ministria e Punëve të Jashtme të Emirateve u zotua në një deklaratë “të vazhdojë çdo përpjekje dhe çdo iniciativë që synon gjetjen e një zgjidhjeje paqësore”, duke e konsideruar “de-përshkallëzimin” si “mjetin e vetëm për të zgjidhur konfliktin” midis Rusisë dhe Ukrainës. /vizionplus.tv
