Një anëtar kyç i kabinetit të luftës të Izraelit ka akuzuar kryeministrin Benjamin Netanyahu se nuk ka thënë të vërtetën për qëllimet ushtarake në Gaza.
Netanyahu ka hedhur poshtë publikisht deklaratën e SHBA-së për një shtet të ardhshëm palestinez dhe këmbënguli se ofensiva do të vazhdojë “deri në fitoren e plotë”.
Por Gadi Eisenkot tha se ata që mbronin “humbjen absolute” të Hamasit nuk po “tregonin të vërtetën”.
Djali i gjeneralit në pension u vra duke luftuar në Gaza, shkruan BBC.
Ai tha gjithashtu se Netanyahu ndante “përgjegjësinë e plotë dhe të qartë” për dështimin për të mbrojtur vendin e tij më 7 tetor dhe kërkoi zgjedhje të reja, duke thënë se “nuk ka besim” në udhëheqjen aktuale të Izraelit.
Hamasi vrau rreth 1300 njerëz dhe mori 240 pengje në sulmin e befasishëm në Izraelin jugor.
Tensionet mes kabinetit, vijnë pasi hendeku midis Izraelit dhe aleatëve të tij perëndimorë zgjerohet.
Pas komenteve të zotit Netanyahu për shtetësinë palestineze, këshilltari i sigurisë kombëtare të Shtëpisë së Bardhë, John Kirby tha se Shtetet e Bashkuara dhe Izraeli “qartësisht i shohin gjërat ndryshe”.
Një zëdhënës i Departamentit të Shtetit tha se nuk kishte asnjë mënyrë për të zgjidhur sfidat e sigurisë së Izraelit pa një shtet palestinez.
Shtëpia e Bardhë tha se Presidenti Joe Biden diskutoi një zgjidhje me dy shtete me Netanyahun gjatë një telefonate të premten, e para në gati një muaj.
Më vonë Biden foli me gazetarët në Uashington dhe kur u pyet nga njëri nëse një zgjidhje me dy shtete ishte e pamundur me zotin Netanyahu në detyrë, ai u përgjigj: “Jo, nuk është”.
Por zoti Netanyahu e ka kaluar karrierën e tij duke i rezistuar një shteti palestinez dhe vetëm muajin e kaluar u mburr se ishte krenar që e kishte parandaluar atë.
Një refuzim tjetër i propozimit të administratës Biden do të rrisë ndjenjën e izolimit të tij ndërkombëtar, pasi vdekjet në Gaza janë afër 25,000, sipas ministrisë së Shëndetësisë të drejtuar nga Hamasi.
SHBA është përpjekur në mënyrë të përsëritur të ndikojë në strategjinë ushtarake të Izraelit gjatë këtij konflikti, duke kërkuar më shumë sulme të drejtuara me saktësi në Gaza në krahasim me sulmet ajrore të përgjithshme dhe angazhimin në bisedime kuptimplote për një zgjidhje me dy shtete.
Por thirrjet janë refuzuar shpesh nga Netanyahu gjatë takimeve të tensionuara me zyrtarët amerikanë.
Nga ana tjetër, brenda Izraelit, kritikat për kryeministrin janë në rritje.
Një sondazh i kohëve të fundit zbuloi se vetëm 15% e izraelitëve duan që ai të mbajë postin e tij pas luftës.
Dhe ndërsa shumica e izraelitëve vazhdojnë të mbështesin veprimet ushtarake kundër Hamasit, shumica tani thonë se duan të kenë prioritet sjelljen e rreth 130 pengjeve të mbetura në Gaza, mbi qëllimin potencialisht të pamundur për të shkatërruar Hamasin./vizionplus.tv
