Diplomacia ruse njoftoi sot se ka kërkuar një takim urgjent të Këshillit të Sigurimit të Kombeve të Bashkuara për të diskutuar sulmet me raketa në Jemen të nisura nga forcat e armatosura të SHBA-së dhe Britanisë kundër rebelëve Houthi.
Irani dënon “shkeljen e sovranitetit kombëtar” të Jemenit
Zëdhënësi i Ministrisë së Jashtme të Iranit, Nasser Kanani tha në një deklaratë për shtyp të lëshuar sot se Republika Islamike “dënon fuqishëm” sulmet me raketa.
“Ne dënojmë fuqishëm sulmet ushtarake të kryera këtë mëngjes nga Shtetet e Bashkuara dhe Mbretëria e Bashkuar kundër qyteteve të Jemenit”, theksoi zoti Kanaani.
“Ne i konsiderojmë ato një shkelje të qartë të sovranitetit kombëtar dhe integritetit territorial të Jemenit, ligjit ndërkombëtar, rregulloreve (ndërkombëtare) dhe të drejtave.”
Një këshilltar i kryeministrit irakian, Fadi Al-Samari, paralajmëroi sot se Perëndimi po zgjeron konfliktin midis Izraelit dhe Hamasit dhe po rrit tensionet në rajon, siç raporton agjencia shtetërore irakiane e lajmeve INA.
Hezbollah: Rezulton se SHBA është plotësisht bashkëpunëtore në tragjeditë dhe masakrat në Gaza
Grupi i armatosur shiit i Libanit, Hezbollah, dënoi sot sulmin ndaj Houthis nga SHBA dhe Britania në Jemen.
Hezbollahu, i cili, ashtu si Houthi-t, konsiderohet i afërt me Iranin, shtoi se “sulmi i SHBA-së konfirmon edhe një herë se SHBA është plotësisht bashkëpunëtore në tragjeditë dhe masakrat e kryera nga armiku sionist në Rripin e Gazës dhe zonë”./vizionplus.tv
