Vetëm dy ekipe, Arsenal dhe Bajern, janë kualifikuar zyrtarisht për në fazën e 1/8 të Champions League, kështu që mbrëmja e sotme, e fundit në fazën e ligës së këtij trofeu, do të jetë vërtet me shumë emocione, pasi do të luhet gjithçka deri në frymën e fundit, për një ose tre pikë më shumë… për një apo për disa gola më shumë.
18 takime do të luhen në të njëjtin orar, 21:00, teksa Vizion Plus ka zgjedhur të transmetojë duelin shumëpritur italo-gjerman, Dortmund–Inter. Vendasit luajnë për të siguruar matematikisht zonën play-off, ndërsa Inter dëshiron me patjetër fitoren për disa arsye: e para, për të provuar një mrekulli, kalimin direkt në fazën tjetër, objektiv që veç suksesit zikaltër duhet të kombinohet me një sërë rezultatesh në favor të skuadrës zikaltëre. E vështirë kjo nëse kemi parasysh se duhet të gabojnë ekipe si Liverpool, Barcelona, Tottenham, PSG, Manchester City apo Atletico Madrid.
E dyta arsye pse i duhet më shumë fitorja Interit, dhe që ka më shumë logjikë sportive, është se Inter me një sukses do të garantonte luajtjen e ndeshjes së kthimit në shtëpi në play-off.
E njëjta situatë është edhe për Juventusin, që shkon të luajë në Francë kundër Monaco, të paktën për të blinduar pozicionin si skuadër pritëse në ndeshjen e kthimit të play-off. Ky objektiv do të arrihej me patjetër me fitore, por ndoshta edhe me barazim.
Napoli–Chelsea është një betejë e vërtetë në “Diego Armando Maradona”. Skuadra e Contes është në një moment minikrize mes kampionatit dhe Europës. Barazimi mund të mos mjaftojë për të kapur as zonën play-off, ndaj ndaj londinezëve sonte do të jetë një natë e rëndësishme.
Skuadrat e tjera të mëdha e kanë vetë në dorë fatin e tyre. Real Madrid mundet që edhe me barazim në Portugali kundër Benfikës të sigurojë direkt kualifikimin në 1/8, ndërsa Liverpool e ka të detyrueshme të fitojë në shtëpi ndaj Karabak që të shkojë më tej. Edhe Tottenham e ka vetë në dorë fatin e vet: mjafton të fitojë në Gjermani ndaj Frankfurtit.
Barcelona pret në shtëpi Kopenhagen dhe duhet të fitojë, madje me rezultat të pastër, në mënyrë që të futet në 8 më të mirat. Bashkë me katalanasit, në të njëjtat kushte, ku mund të ndahen vetëm nga golavarazhi, janë edhe Manchester City, Atletico Madrid, Sporting Lisbona dhe Chelsea.
Duel direkt në Paris mes vendasve kampionë Europe dhe Newcastle. Kush fiton kualifikohet në 1/8, barazimi i nxjerr jashtë të dyja.
Për këto arsye, Champions League është gati të dhurojë sonte duele vërtet shumë interesante./vizionplus.tv
